फाइनल प्रवेश गर्न नेपाल र इरान भिड्ने

काठमाडौं। घरेलु टोली नेपालले काभा वुमन्स नेसन्स भलिबल लिगको फाइनल प्रवेशक लागि इरानको सामना गर्ने भएको छ।

त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा सोमबार भएको खेलमा भारतले श्रीलंकालाई ३–० को सोझो सेटमा पराजित गरेसँगै सेमिफाइनल समीकरण पूरा भएको हो। भारत १० अंक जोड्दै शीर्ष स्थानमा रहेर सेमिफाइनल पुग्यो। भारतले इरानलाई ३–१ र माल्दिभ्सलाई ३–० को सोझो सेटमा पराजित गरेको थियो। यस्तै, नेपालसँग भने ३–२ को सेटमा पराजित भयो।

लिग चरणका सबै खेल खेलिसकेको इरानले सात अंक जोड्यो भने माल्दिभ्ससँग खेल्न बाँकी नेपालको पाँच अंक रहेको छ। इरानले श्रीलंका तथा नेपाललाई ३–२ र माल्दिभ्सलाई ३–० को सोझो सेटमा पराजित गरेको थियो। 

नेपालले पहिलो खेलमा उपाधि जित्ने लक्ष्यसाथ काठमाडौं उत्रिएको श्रीलंकालाई ३–० को सोझो सेटमा निराश पारेको थियो।

दोस्रो खेलमा उपाधिको दाबेदार भारतमाथि ३–२ को रोमाञ्चक जित हासिल गर्दै नेपालले सेमिफाइनल स्थान सुरक्षित गरेको थियो। तर, आइतबार भएको तेस्रो खेलमा भने नेपालले अपेक्षा गरेअनुसार प्रदर्शन गर्न सकेन र इरानलाई ३–२ ले नतिजा सुम्पियो।

श्रीलंकाले भने चार अंकमात्रै जोड्न सक्यो। उसले माल्दिभ्सलाई ३–० को सोझो सेटमा पराजित गर्‍यो भने इरानसँग एक अंक खोस्यो। पाँच टोली सहभागी प्रतियोगितामा श्रीलंका चौथो स्थानमा रह्यो। माल्दिभ्स भने प्रतियोगिताबाट बाहिरिइसकेको छ। काभाले लिगचरणमा शीर्ष स्थानमा रहनेले चौथो र दोस्रो स्थानमा रहनेले तेस्रो स्थानमा खेल्ने तय गरेको थियो। 

त्यसकारण नेपालले माल्दिभ्सलाई सोझो सेटमा पराजित गरेपनि आठ अंक जोड्ने छ। यसको मतलब नेपाल लिगचरणमा दोस्रो हुनेछ। पराजित भए नेपाल तेस्रो स्थानमा रहने छ। त्यसैले लिगचरणको अन्तिम खेलको नतिजाले नेपालको सेमिफाइनल समीकरण बिगार्ने छैन।  

यसअघि युवा खेलाडीले भरिएको इरानले नेपाललाई ३–२ को सेटमा पराजित गरेको थियो। नेपाल त्यही हारको बदला लिने लक्ष्यमा हुनेछ।