काठमाडौं। ट्वान्टी–२० मा श्रीलंकालाई पराजित गरेको भारतीय टोली एकदिवसीय शृंखलामा संघर्षरत देखिएको छ। कोलम्बोमा भएको पहिलो खेल बराबरीमा सकिएको थियो।
दोस्रो खेलमा भारत ३२ रनले पराजित भएको छ। श्रीलंकाका स्पिनर जेफ्री भान्डरसेले ३३ रन खर्चेर ६ विकेट लिँदै भारतलाई लक्ष्य हासिल गर्नबाट रोकेका थिए। बलिङतर्फ श्रीलंकाका कप्तान चरिथ असालंकाले पनि २० रन खर्चेर तीन विकेट लिए।
अविष्का फर्नान्डो (४०), कामिन्दु मेन्डिस (४०) र दुनित वेलाल्ज (३९) को उपयोगी इनिङ्सको मद्दतमा श्रीलंकाले भारतलाई जितका लागि २४१ रनको लक्ष्य दिएको थियो।
जवाफमा रोहित शर्माले ६४ र अक्षर पटेलले ४४ रन बनाए पनि अन्य ब्याट्सम्यानले सम्हालिएर नखेल्दा भारत ३२ रनले पराजित भएको हो। जितसँगै श्रीलंकाले तीन खेलको शृंखलामा १–० को अग्रता लिएको छ। शृंखलाको अन्तिम खेल बुधबार हुनेछ।
भारतीय टोलीले राम्रो सुरुआत गरेको थियो। रोहितले एक एन्डबाट तीव्र गतिमा रन बनाएका थिए। रोहित र शुबमन गिलले पहिलो विकेटका लागि ९७ रनको साझेदारी गरे। रोहितले ४४ बलमा ५ चौका र ४ छक्काको मद्दतमा ६४ रन बनाए।
शुबमनले ४४ बलमा ३५ रन बनाए भने विराट कोहलीले १४ रन बनाए। श्रीलंकाका बलर जेफ्री भान्डरसेले भारतीय ब्याट्सम्यानमाथि दबदबा कायम राखेका थिए। जेफ्रीले ७ ओभरमा ६ विकेट लिए। यसले भारतीय ब्याट्सम्यानलाई समस्यामा पार्यो।
मिडिल अर्डरमा अक्षर पटेलले मात्र स्पिनरसँग सम्हालिएर खेलका थिए। तर, उनी ४४ रनको स्कोरमा असालंकाको हातबाट क्याच आउट भए। पुछारका ब्याट्सम्यान कुलदीप, मोहम्मद सिराज र अर्शदीपले दबाब थेग्न नसक्दा टोली २०८ रनमा समेटियो।
टस जितेर पहिले ब्याटिङ रोजेको श्रीलंकाले ५० ओभरमा ९ विकेट गुमाएर २४० रन बनाएको थियो। श्रीलंकाको सुरुआत खराब रह्यो। पटुम निसानका खाता नखोली पेभेलियन फर्किए। उनलाई सिराजले विकेटकिपर केएल राहुलको हातबाट क्याच आउट गराए। त्यसपछि अविष्का फर्नान्डो र कुसल मेन्डिसले दोस्रो विकेटका लागि ७४ रनको साझेदारी गरे।
वाशिंगटन सुन्दरले १७ औं ओभरमा अविष्कालाई आफ्नै बलमा क्याच आउट गराएर भारतलाई दोस्रो विकेट दिलाए। त्यसपछि कुशल मेन्डिस र सदिरा समरविक्रमाले तेस्रो विकेटका लागि ७९ रनको साझेदारी गरे।
अक्षर पटेलको बलमा कोहलीको हातबाट क्याच आउट भएका सदिराको रुपमा श्रीलंकाको चौथो विकेट १ रनमा झरेको थियो। डुनित वेलालेजले ३९ र कामिन्दु म्याडिन्सले ४४ बलमा ४० रनको उपयोगी इनिङ्स खेल्दै टोलीको स्कोर २४० रनसम्म पुर्याए।
भारतका लागि वासिङ्टन सुन्दरले ३० रन खर्चेर तीन विकेट लिए। कुलदीप यादवले ३३ रन खर्चेर दुई विकेट लिए। मोहम्मद सिराज र अक्षर पटेलले समान एक–एक विकेट लिए भने २ खेलाडी रनआउट भए।
