काभा बिच भलिबल विजेता र उपविजेता टोली स्वदेश फिर्ता

काठमाडौं। काभा बिच भलिबल च्याम्पियनसिप विजेता नेपाली महिला टोली र उपविजेता पुरुष टोली स्वदेश फर्किएको छ।

भुटानको थिम्पुमा शनिबार भएको च्याम्पियनसिपको फाइनलमा उज्बेकिस्तानलाई २-० को सोझो सेटमा हराउँदै कमला पुन र मनिषा चौधरीको जोडी च्याम्पियन बनेको थियो। 

यस्तै, मानबहादुर श्रेष्ठ र दिलबहादर सुनारको जोडी फाइनलमा माल्दिभ्ससँग २-० ले पराजित भएको थियो। उक्त जोडी र प्रशिक्षक रुपेश विष्टलाई नेपाल भलिबल संघका अध्यक्ष जितेन्द्रबहादुर चन्दलगायतका पदाधिकारीहरुले त्रिभुवन अन्तर्राष्ट्रिय विमानस्थलमा स्वागत गरे।

नेपाली महिला जोडीले पहिलोपल्ट काभा बिच भलिबलमा उपाधि जितेको हो। फाइनलमा उज्बेकिस्तानलाई नेपालले २१ -१७ र २१-१४ को सेटमा पराजित गरेको थियो। यस्तै, मानबहादुर र दिलबहादुरको जोडी फाइनलमा माल्दिभ्ससँग १९-२१ र १७-२१ ले पराजित भयो।

च्याम्पियनसिपमा पुरुषमा १० टोली र महिलामा ७ टोलीको सहभागिता रहेको थियो। नेपालबाहेक अन्य देशका दुई टोलीहरुले प्रतिस्पर्धा गरेका थिए।