पेरिस ओलम्पिकमा एलेक्जेन्डरको राष्ट्रिय कीर्तिमान सुधार

काठमाडौं। नेपाली पौडीबाज एलेक्जेन्डर शाह पेरिस ओलम्पिक २०२४ आफ्नै नामको राष्ट्रिय कीर्तिमान सुधार गरेका छन्। पुरुष १०० मिटर फ्रि–स्टायलमा उनले प्रतिस्पर्धा गरेका थिए।

हिट ३ मा प्रतिस्पर्धा गरेका उनी ५१.९१ सेकेन्डको समय निकाल्दै एलेक्स आठ खेलाडी रहेको समूहमा तेस्रो भएका थिए। योसँगै उनले नाममा रहेको राष्ट्रिय कीर्तिमान सुधार गरेका हुन्।

उनले गत फेब्रुअरीमा कताको दोहामा भएको विश्व च्याम्पियनसिपमा ५२.१७ सेकेन्डको राष्ट्रिय कीर्तिमान बनाएका थिए। एलेक्सले वाइल्ड कार्डमार्फत् पेरिस ओलम्पिकमा आफ्नो स्थान पक्का गरेका थिए।

उनले तीन वर्षअघि भएको टोकियो ओलम्पिक २०२० मा पनि सहभागिता जनाएका थिए। पनि खेलेका थिए। उक्त ओलम्पिकमा पुरुष १०० मिटर फ्रि–स्टायलमा उनले ५३.४१ सेकेन्डको समय निकालेका थिए।

एलेक्सले सन् २०१९ मा दक्षिण कोरियामा भएको विश्व च्याम्पियनसिपमार्फत अन्तर्राष्ट्रिय प्रतियोगितामा डेब्यु गरेका थिए। त्यसयता उनले २०२३ र २०२४ गरी तीन पटक विश्व च्याम्पियनसिप र २०२२ को एसियन गेम्समा सहभागिता जनाइसकेका छन्।

अमेरिकामा बसेर अध्ययन र प्रशिक्षण गर्दै आएका एलेक्स उतैबाट पेरिस पुगेका हुन्।