काठमाडौं। गत नोभेम्बरमा ५० ओभरको आइसिसी क्रिकेट विश्वकपको फाइनलमा भारतले अस्ट्रेलियाविरुद्ध पीडादायी हार बेहोरेको थियो। त्यसयता भारतीय टिम उत्कृष्ट लय समात्न संघर्षरत रहेको छ।
यसपालि आइसिसी ट्वान्टी–२० विश्वकप २०२४ को सुपर एटमा अस्ट्रेलियाविरुद्धको जित भारतको लागि नोभेम्बरमा बेहोरेको फाइनलको हारको बदलाजस्तै थियो।
आइसिसी ट्वान्टी–२० विश्वकप २०२२ को सेमिफाइनलमा इङ्ल्यान्डले भारतलाई हराएको थियो। त्यो सामान्य हार मात्रै थिएन। पछि च्याम्पियन भएको इङ्ल्यान्डले आइपिएलका चर्चित खेलाडीहरूलाई ध्वस्त पार्दै १० विकेटको जित निकालेको थियो। यसपालि भारतले त्यो हारको बदला लिने अवसर पनि पाएको छ।
भारतले आज बिहीबार बेलुकी आइसिसी ट्वान्टी–२० विश्वकप २०२४ को सेमिफाइनलमा डिफेन्डिङ च्याम्पियन इङ्ल्यान्डविरुद्ध प्रतिस्पर्धा गर्दैछ। तर, भारतका कप्तान रोहित शर्मा गुयनामा हुने दोस्रो सेमिफाइनलमा पुराना कुरा कोट्याउन चाहँदैनन्। न कि बदलाको भावना नै व्यक्त गर्छन्।
‘हामी यसलाई यो प्रतियोगिताको अर्को एउटा खेलको रूपमा लिएर प्रतिस्पर्धा गर्न चाहन्छौं र विगतका कुरालाई नसोच्ने प्रयास गर्नेछौं,’ प्रि–म्याच प्रेस–कन्फ्रेन्समा रोहितले भनेका छन्।
भारत घरेलु भूमिमा ५० ओभरको विश्वकपमा जस्तै यहाँ (ट्वान्टी–२० विश्वकप) मा पनि अपराजित रहेको छ। तैपनि रोहित फाइनलबारे सोधिएको प्रश्नमा यो टिमले धेरै टाढासम्म नसोचिएको प्रतिक्रिया दिएका छन्। उनले भने, ‘यदि कुनै पनि कुरा धेरै सोचियो भने मैदानमा चाहेजसरी निर्णय गर्न सकिँदैन।’
सुपर एटको अन्तिम खेलमा ५० ओभरको विश्वकप च्याम्पियन अस्ट्रेलियाविरुद्ध रोहितले २२४ को स्ट्राइक रेटमा कप्तानी इनिङ्स खेल्दै मैदानमा पनि नेतृत्वदायी प्रदर्शन गरेका थिए, जहाँ अरू ब्याटरमध्ये एक जनाले मात्रै ३० रन छोएको थियो। तर, उनी व्यक्तिगत स्कोर र व्यक्तिगत उत्कृष्ट प्रदर्शनले धेरै फरक नपार्ने उल्लेख गर्दै त्यतातिर ध्यान नदिने बताउँछन्।
ट्वान्टी–२० क्रिकेटमा भारतका मुख्य ब्याटर विराट कोहलीले यो विश्वकपमा आफ्नो कौशल देखाउन सकेका छैनन्। इङ्ल्यान्डका प्रशिक्षक म्याथ्यु मट पनि ३५ वर्षीय कोहलीलाई लयमा फर्कन दिन चाहँदैनन्। उनले कोहलीको लागि राम्रो तयारी गरेको उल्लेख गर्दै सेमिफाइनललाई सनसनीपूर्ण बनाउनको लागि आफ्ना खेलाडीहरूले संघर्ष गर्ने बताए। भारतले ब्याटिङ र बलिङमा आक्रामक प्रदर्शन गरिरहेको छ।
‘हामीले एक अर्कासँग खेल्दा प्रतियोगितामा के भएको थियो भन्ने कुराले केही फरक पार्दैन,’ प्रशिक्षक मटले भने, ‘ठूला खेलाडीले महत्त्वपूर्ण क्षणमा आफूलाई साबित गर्दछन्। हाम्रा खेलाडीले त्यस्तै गर्ने आशा गरेको छु। तर, कोहलीबाट पनि ठिक त्यस्तै आशा गरिएको होला।’
यो विश्वकपको फाइनल पुगिसकेको दक्षिण अफ्रिकासँगै अपराजित रहेको अर्को टिम भारत मात्रै हो। पाकिस्तानविरुद्ध संकटमा परेर पनि जोगिएको भारतले त्यसपछि ठूलै अन्तरमा जित हासिल गरिरहेको छ।
इंल्यान्डले वर्षाले रद्द भएको स्कटल्यान्डविरुद्धको खेलबाट विश्वकप सुरु गरेको थियो। त्यसपछि अस्ट्रेलियाविरुद्ध हारेको इङ्ल्यान्डले ओमान र नामिबियाविरुद्ध ठूलो अन्तरको जित रच्दै सुपर एटमा स्थान बनाएको थियो। उसले सुपर एटमा दक्षिण अफ्रिकाविरुद्ध हारे पनि वेस्ट इन्डिज र अमेरिकालाई पन्छाउँदै उपाधि रक्षाको अभियानलाई सेमिफाइनलमा पुर्याएको हो।
हेड–टु–हेड
ट्वान्टी–२० क्रिकेटको संरचनामा भारत र इङ्ल्यान्डको आपसी प्रतिस्पर्धाको नतिजामा खास फरक छैन, रोमाञ्चक नै छ।
यी दुईले २३ खेल खेलेका छन्, जसमा भारतले १२ खेल जितेको छ भने इङ्ल्यान्डले ११ खेलको नतिजा कब्जा गरेको छ। यी दुईबीचको पछिल्लो खेल ट्वान्टी–२० विश्वकप २०२२ को सेमिफाइनल हो, जहाँ इङ्ल्यान्डले १० विकेटको जित हात पारेको थियो।
गुयनाको राजधानीमा बर्षात् हुने अनुमान गरिएको छ, जसले खेललाई असर पार्न सक्छ। दोस्रो सेमिफाइनलको लागि वैकल्पिक दिन राखिएको छैन। खेल पूरा गर्नको लागि २५० मिनेट थप्न सकिने व्यवस्था छ। खेल सम्भव नभए वा रद्द भएको अवस्थामा सुपर एटमा समूहको शीर्षस्थानमा रहेको टिमलाई फाइदा हुनेछ। यस्तोमा भारत फाइनलमा प्रवेश गर्नेछ।