काठमाडौं। अफगानिस्तानको पहिलो पटक फाइनल पुग्ने सपना बिहीबार अधुरो रह्यो। उसलाई नौ विकेटले पराजित गर्दै दक्षिण अफ्रिका पहिलो पटक उपाधिनजिक पुग्यो।
अफगानिस्तानको लज्जास्पद हारप्रति कप्तान राशिद खानले निराशा व्यक्त गरेका छन्। ब्रायन लारा रंगशालामा खेलिएको यस खेलमा अफगानिस्तानले पहिले ब्याटिङ गरेको ११.५ ओभरमा १० विकेट गुमाएर ५६ रन बनाएको थियो। जवाफमा दक्षिण अफ्रिकाले ८.५ ओभरमा एक विकेट गुमाएर ६० रन बनायो र फाइनलमा पुग्ने पहिलो टोली बन्यो।
खेलपछि राशिदले दक्षिण अफ्रिकाका बलरको तारिफ गरेका छन्। ‘एक टोलीको रूपमा हाम्रो लागि यो धेरै गाह्रो थियो। हामीले अझ राम्रो प्रदर्शन गर्न सक्थ्यौं, तर परिस्थितिले हामीलाई जे गर्न मन लागेको थियो त्यो गर्न दिएन,’ उनले भने।
उनले थपे, ‘टी-२० क्रिकेटमा सबै परिस्थितिमा राम्रो प्रदर्शन गर्नुपर्छ। दक्षिण अफ्रिकाले यस प्रतियोगितामा साँच्चै राम्रो बलिङ गरे। फास्ट बलरहरूले राम्रो सुरुवात गरे।’
पहिलो सेमिफाइनलमा अफगानिस्तानको ब्याटिङ अर्डर ध्वस्त भएको थियो। यो खेलमा अफगानिस्तानका कुनै पनि ब्याट्सम्यानले ठूलो इनिङ्स खेल्न सकेनन्। टोलीका लागि अजमातुल्लाह उमरजाईले सर्वाधिक १० रन बनाए। बाँकी कुनै पनि ब्याट्सम्यानले दोहोरो अंक छुन सकेनन्। दक्षिण अफ्रिकाका मार्को जान्सेन र तबरेज शम्सीले ३–३ विकेट लिए। त्यस्तै, कागिसो रबाडा र एनरिच नोर्टजेले २–२ विकेट लिए।
‘मुजिब उर रहमानको चोटले हामीलाई धेरै घाटा गर्यो। तर, हाम्रा फास्ट बलर र मोहम्मद नाबीले पनि नयाँ बलमा उत्कृष्ट बलिङ गरे। यसले हामी स्पिनरलाई मद्दत गर्यो। हामीले सेमिफाइनल खेल्न पाएका छौं र अफ्रिका जस्तो शीर्ष टोलीसँग हार्नु भनेको हाम्रो लागि उत्कृष्ट अनुभव हो। हामीले यहाँ धेरै कुरा सिक्यौं,’ उनले भने।
