मलेसियाविरुद्ध टस हारेर बलिङ गर्दै नेपाल

काठमाडौं । थाइल्याण्डमा जारी थाइल्याण्ड महिला टी -ट्वान्टी स्म्यास क्रिकेटको दोस्रो खेलमा नेपालले अहिले मलेसियाको सामना गर्दैछ ।

मलेसियाविरुद्ध नेपालले टस हारेको छ र पहिले बलिङ पाएको छ । मलेसियाले टस जितेर ब्याटिङ रोजेपछि नेपालले पहिले फिल्डिङ गर्न लागेको हो  । 

पहिलो खेलमा चीनलाई हराउन सफल नेपाली टोली मलेसियाविरुद्ध दोस्रो जितको खोजीमा मैदान उत्रिएका छन् । 

थाइल्याण्ड क्रिकेट एसोसियसनको आयोजनामा जारी प्रतियोगिताको समूह 'ए' मा रहेको नेपालले पहिलो खेलमा चीनलाई १० विकेटले हराएको थियो  ।

नेपाल आज मलेसियालाई हराएर सेमिफाइनलमा पुग्ने सम्भावना बलियो बनाउन चाहन्छ । तर, मलेसियाविरुद्ध नेपाललाई जित निकाल्न कठिन भने देखिन्छ ।

नेपालले सोमबार युएई र बुधबार थाईल्याण्डसंग प्रतिस्पर्धा गर्नेछ । समूहका शीर्ष दुई टोली अन्तिम ४ मा प्रवेश गर्नेछन् ।