सन्दीपको टिम सिक्सर्सको दोस्रो हार

काठमाडौं । नेपाली राष्ट्रिय टोलीका लेग स्पिनर सन्दीप लामिछाने रहेको सिलेट सिक्सर्सले बंगलादेश प्रिमियर लिग (बीपीएल) क्रिकेटमा दोस्रो हार व्यहोरेको छ ।

शनिबार भएको खेलमा सन्दीपको टिम सिक्सर्स ढाका डाइनामाइट्ससंग ३२ रनले पराजित भएको हो । 

डाइनामाइट्सले दिएको १७४ रनको लक्ष्य पछ्याएको सिक्सर्सले पुरै २० ओभर खेल्दै ९ विकेट गुमाएर १४१ रन बनाउन सक्यो । सिक्सर्सका लागि निकोलस पुरणले ७२ रन जोडेपनि टोलीलाई जित दिलाउन सकेनन् ।

सन्दीप १ रनमा आउट भए । डाइनामाइट्सका रुबेल हुसेनले ३ विकेट लिए । यस्तै शाकिब अल हसन र शुभगटा होमले समान २/२ विकेट लिए । 

यसअघि टस जितेर पहिले ब्याटिङ गरेको डाइनामाइट्सले पुरै २० ओभर खेल्दै ७ विकेट गुमाएर १७३ रन बनाएको थियो ।

डाइनामाइट्सका लागि रोनी तालुकदारले ५८ रन जोडे । यस्तै सुनील नारिने र मोहमद निमले समान २५/२५ रन जोडे ।

सिक्सर्सका तास्किन अहमेदले ३ विकेट लिए । नेपालका सन्दीप भने महँगो साबित हुँदै विकेट लिन असफल भए । सन्दीपले ४ ओभर बलिङ गर्दै बिना विकेट ३३ रन खर्चिए ।

सिक्सर्समाथिको जितसंगै डाइनामाइट्सले लगातार चौथो जित निकालेको छ । र, लिगको शीर्ष स्थानमा रहेको डाइनामाइट्सले ८ अंक जोडेको छ ।

पराजित सिक्सर्सले भने ३ खेलबाट २ अंक जोडेको छ ।  सिक्सर्स पाँचौ स्थानमा रहेको छ । पहिलो खेलमा कोमीला भिक्टोरियन्ससंग पराजित सन्दीपको टिम सिक्सर्सले दोस्रो खेलमा चितागोङ भीकिङसलाई हराएको थियो ।