काठमाडौं। ठिक एक दशकअघि टी–२० विश्वकप २०१४ खेलेको नेपाली राष्ट्रिय टिमका महत्त्वपूर्ण सदस्य शरद भेषावकरले क्रिकेटमा पिचको कन्डिसनले ठूलो फरक पार्ने र कठिन कन्डिसनमा अनुभवी खेलाडी आवश्यक रहेका बताएका छन्।
एक दशकपछि विश्वकपमा फर्कँदा नेपालले पहिलो खेलमा नेदरल्यान्ड्सविरुद्ध ६ विकेटले हारेका थियो। टस हारेपछि नेपाल १९.२ ओभरमा १०६ रनमा अलआउट भएको थियो। ग्रयान्ड प्रेरी रंगशाला, डालासमा भएको उक्त खेलबारे शरदले भने, ‘जुन कन्डिसनमा हामीले ब्याटिङ गर्न पुगेका थियौं, त्यो एकदमै गाह्रो कन्डिसन थियो।’
यो विश्वकपमा प्रयोग गरिएको पिचमा ठूला टिमलाई पनि गाह्रो भइरहेको उल्लेख गर्दै शरदले भने, ‘इन्डिया र आयरल्यान्डको खेलमा दुवै टिमलाई सुरुमा गाह्रो भइरहेको थियो। कन्डिसनलाई दोष दिने त होइन तर त्यो खेलमा अझै राम्रो पहुँच दिन सक्थ्यौं जस्तो लाग्छ।’
नेदरल्यान्ड्सविरुद्ध खेल्नुअघि भएको बर्षाले पनि असर गरेको जनाउँदै उनले भने, ‘नेपालविरुद्ध नेदरल्यान्ड्सको खेल अमेरिकी समयअनुसार बिहान थियो। बिहानको गेम, त्योमाथि बिहान पानी परेको थियो। पानी परिसकेपछि पिचमा केही न केही फरक पर्छ। पिचको हर्कत फेरिन्छ। अलि ओसिलो थियो। पिचमा बल ठोकिसकेपछि हल्लिरहेको थियो। ब्याटलाई एकदमै गाह्रो भइरहेको थियो। हाम्रो टिमले खेल्दा त्यस्तो खालको पिचको कन्डिसन भेटेको थिएन होला।’
नेपाली टिमलाई कमेन्टेटरहरूले युवा टिम भनिरहेका छन्। कठिन कन्डिसनमा अनुभवी खेलाडी पनि आवश्यक रहेको शरदले बताए। उनले भने, ‘हाम्रा धेरै खेलाडी टी–२० फर्म्याटमा आएका छन्, जहाँ विकेट फ्ल्याट हुन्छ र जाने (क्रिजमा) बित्तिकै सटहरू खेल्न थाल्छन्। यस्तो कन्डिसनमा कस्तो सट खेल्ने कस्तो नखेल्ने भन्ने लङ फर्म्याट ले आइडिया दिन्छ। स्पष्ट देखियो कि राम्रो बललाई पनि सम्मान नगरी सबै बललाई हिर्काउन खोजिरहेको थियो। गाह्रो भएको बलमा एक–दुई रन लिएर बिस्तारै झुर बललाई अट्याक गरेर १२०–३० रनको स्कोर भएको भए खेल जता पनि जान सक्थ्यो जस्तो लाग्छ।’
उस्तै स्तरको टिमविरुद्ध टस महत्त्वपूर्ण भएका पनि शरदले बताए। साथै, सानो स्कोर रक्षा गर्ने अभियानमा मैदानमा हतासिनु, क्याच गुमाउन पुग्नुले पनि नतिजामा फरक पारेको उनको बुझाई छ। उनीसँग यही टी–२० विश्वकप २०२४ र एक दशकअघि नेपालले विश्वकप २०१४ मा डेब्यू गर्दाको अनुभव समेटिएको छोटो वार्ता:
