विराटनगर। इमरन नाजिरको शतक र देव खनालको अर्धशतकसँगै विराटनगरको वाईआरसीसी क्रिकेट क्लब तेस्रो संस्करणको मिल्स कप टी–२० क्रिकेट प्रतियोगिताको उपाधिनजिक पुगेको छ।
शनिबार सम्पन्न पहिलो सेमिफाइनल खेलमा विराटनगरकै एनबीएससी क्रिकेट क्लबलाई ११६ रनले हराउँदै वाईआरसीसी फाइनलमा पुगेको हो।
जितसँगै वाईआरसीसीले आइतबार हुने दोस्रो सेमिफाइनल खेलमा भारत विहारको कटियार र विराटनगरको होराइजन क्रिकेट क्लबबीच हुने दोस्रो सेमिफाइनलको विजेतासँग उपाधिको लागि खेल्नेछ।
वाईआरसीसीले दिएको २५२ रनको लक्ष्य पछ्याएको एनबीएससीले १२. १ ओभरमा सबै विकेट गुमाई १३५ रन मात्रै बनाउन सक्यो। एनबीएससीका राहुल रिमालले २० बलमा अर्धशतक ५० रन बनाए। उनले ७ छक्का र १ चौका हिर्काए। राहुल चौधरीले २० बलमा ४७ रन बनाउँदा एनबीएससीका अन्य ब्याटरले दोहोरो अंक ल्याउन सकेनन्।
वाईआरसीसीका अलराउन्डर खेलाडी अभिषेक पाठकले कसिलो बलिङ गर्दै ४ ओभरमा २४ रन खर्चेर ४ विकेट लिए। नारायण जोशीले ३ ओभरमा २७ रन खर्चेर ३ विकेट लिए।
त्यसअघि विराटनगर जुट मिलको खेल मैदानमा टस जितेर ब्याटिङ रोजेको वाईआरसीसीले १९.४ ओभरमा सबै विकेट गुमाई २५१ रन बनाएको थियो।
वाईआरसीसीको जितको लागि इमरन नाजिरले आक्रामक ब्याटिङ गर्दै शतक कटाए। ३८ बलमा उनले १४ छक्का र ३ चौका हिर्काउँदै १०४ रन बनाएका हुन्।
देव खनालले २६ बलमा ६ छक्का र ६ चौका हिर्काउँदै ६१ रन बनाए। अभिषेक पल र सन्दीपले समान २३/२३ रन बनाए। एनबीएससीका अनुभवले कसिलो बलिङ गर्दै २.४ ओभरमा २२ रन खर्चेर ५ विकेट लिए। राहुल र राहुल किशोरले समान २/२ विकेट लिए।
प्लेअर अफ द म्याच सर्वाधिक रन बनाउने वाईआरसीसीका इमरन घोषित भए। उनले तीन हजार रुपैयाँ पाए।
