काठमाडौँ। लगातार ५ जित हात पारेको रोयल च्यालेन्जर्स बेंग्लोरले इन्डियन प्रिमियर लिग (आईपीएल)मा शनिबार ५ पटकको च्याम्पियन चेन्नई सुपर किंग्सको सामना गर्दै छ।
यस खेलमा मौसमका कारण रद्द हुने सम्भावना रहेको छ। गुजरात टाइटन्ससँगको खेल वर्षाका कारण रद्द भएपछि सनराइजर्स हैदरावाद प्लेअफमा पुग्ने तेस्रो टोली बनेको थियो।
यसअघि नै कोलकाता नाइट राइडर्स र राजस्थान रोयल्स प्लेअफमा पुगिसकेका छन्। अब एक स्थानका लागि मात्र रस्साकस्सी बाँकी छ। दुई टोली बेंग्लोर र चेन्नई यो एक स्थानमा लागि प्रतिस्पर्धामा छन्।
बेंग्लोर अहिले उत्कृष्ट लयमा फर्किएको छ। ६ खेलको हारको क्रम तोडेपछि बेंग्लोरले लगातार ५ खेलमा जित हात पारेको छ। भारतीय क्रिकेट टिमका पूर्वकप्तान विराट कोहलीले पछिल्ला ५ खेलमध्ये ३ खेलमा अर्धशतक बनाएका छन्। पछिल्ला दुई खेलमा दोहोरो अंकमा पुग्न नसकेका कप्तान फाफ डु प्लेसिसबाट पनि राम्रो इनिङ्सको अपेक्षा गर्न सकिन्छ।
मध्यक्रममा रजत पाटीदार र क्यामरुन ग्रीनले राम्रो खेलिरहेका छन्। महिपाल लोमरोर र दिनेश कार्तिकले पनि चिन्नास्वामी स्टेडियमको पिचको फाइदा उठाउन सक्छन्।
बेंग्लोरका बलरमध्ये यश दयालले यो सिजन सबैभन्दा धेरै विकेट लिएका छन्। लोकी फर्गुसन, मोहम्मद सिराज, ग्रिन र स्वप्निल सिंहजस्ता बलरले पनि राम्रो प्रदर्शन गरिरहेका छन्।
चेन्नईका लागि कप्तान रुतुराज गायकवाडले यस सिजनमा सर्वाधिक रन बनाएका छन्। उनले यो लयलाई कायम राख्ने अपेक्षा गरिएको छ। ओपनर रचिन रविन्द्रले पनि उपयोगी इनिङ्स खेल्दै आएका छन्। पछिल्ला ४ इनिङ्समा असफल भएका शिवम दुबेले पनि बेंग्लोरविरुद्ध राम्रो प्रदर्शन गर्ने अपेक्षा गरिएको छ।
बलिङतर्फ तीव्र गतिका बलर सिमरजीत सिंह र तुषार देशपाण्डेले उत्कृष्ट प्रदर्शन गरिरहेका छन्। टोलीमा मुस्ताफिजुर रहमान, माथिशा पाथिराना र दीपक चाहर छन्। तर, उनीहरू मैदानमा हुने छैनन्। महेन्द्रसिंह धोनीको उपस्थिति चेन्नईका लागि प्रेरणाको स्रोत हो। तर, उनले चोटको बीचमा कति योगदान दिन सक्छन् त्यो हेर्न बाँकी छ।
हेड टू हेड
कुल खेल – ३२
बेंग्लोर – १० जित
चेन्नई – २१ जित
बराबरी – १
चेन्नई चिन्नास्वामी स्टेडियममा ८ खेलमा बेंग्लोरसँग एक पटक मात्र हारेको छ। राम्रो रनरेट र अधिक अंक (१३ अंक र ०.५२८ नेटरनरेट) का कारण चेन्नईको प्लेअफमा पुग्ने सम्भावना बलियो छ।
चेन्नई अंक तालिकाको चौथो स्थानमा छ। बेंग्लोरको १२ अंक छ र नेटरनरेट ०.३८७ रहेको छ। बेंग्लोर अंकतालिकाको छैटौँ स्थानमा छ। त्यस्तै, बेंग्लोरले कम्तिमा १८ रन या ११ बल बाँकी छँदै जित हासिल गर्नुपर्नेछ।
