काठमाडौँ। कुशल भुर्तेल र गुल्शनकुमार झाले ६ विकेट लिएसँगै नेपालले अभ्यास खेलमा लगातार दोस्रो जित हासिल गरेको छ।
बिहीबार राति सम्पन्न खेलमा नेपालले विनवार्ड्स भोलक्यानोजलाई ४९ रनले पराजित गरेको हो। मंगलबार राति सम्पन्न खेलमा पहिलो अभ्यास खेलमा नेपाल ४ विकेटले विजयी भएको थियो।
नेपालले दिएको १८० रनको लक्ष्य पछ्याएको भोलक्यानोजले १८.५ ओभरमा सबै विकेट गुमाउँदै १३० रन मात्रै बनाउन सक्यो।
नेपालका कुशल भुर्तेले ३ ओभरमा १२ रन खर्चिएर ३ विकेट लिए। समान विकेट लिज गुल्शनकुमार झाले १८ रन खर्चिए।
सोमपला कामी, ललितनारायण राजवंशी, दीपेन्द्रसिंह ऐरी र अभिनाश बोहराको नाममा १/१ विकेट रह्यो।
त्यसअघि पार्क हिल मैदानमा टस जितेर पहिला ब्याटिङ थालेको नेपालले निर्धारित २० ओभरमा ९ विकेट गुमाउँदै १७९ रन बनाएको हो।
अनिलकुमार साहले सर्वाधिक ५० रन बनाए। २७ बल खेलेका उनले ४ चौका र ४ छक्का प्रहार गरे। कप्तान रोहितकुमार पौडेल ४१, कुशल भुर्तेल ३८ र दीपेन्द्रसिंह ऐरी २६ रनमा आउट हुँदा अन्यले राम्रो प्रदर्शन गर्न सकेनन्।
निकलस रेडहेड, शाड्राक डेकार्टे र ड्यारेन नेडले २/२ विकेट लिए।
