काठमाडौँ। न्यूयोर्कको आइसेनहोवर पार्कले आईसीसी टी–२० विश्वकप आयोजना गर्ने तयारी गरेको छ। ३४ हजार दर्शक क्षमताको यो रंगशालाको बुधबार विश्वका तीव्रगतिका धावक तथा विश्वकपका राजदूत उसन बोल्टले औपचारिक रूपमा उद्घाटन गरे।
१ जुनदेखि वेस्ट इन्डिज र अमेरिकामा शुरू हुने विश्वकपअघि अन्तर्राष्ट्रिय क्रिकेट परिषद् (आईसीसी)ले यस मैदानमा केही परीक्षण गर्नेछ। अमेरिकामा हुने प्रतियोगिताका ८ खेल न्यूयोर्कमा हुने तय भएको छ।
जसमध्ये ४ डलास र ४ टेक्सासमा हुनेछन्। पहिलो खेल नासाउ काउन्टीको आइसेनहोवर पार्कमा खेलिनेछ। जुन ३ जुनमा दक्षिण अफ्रिका र श्रीलंकाबीच हुनेछ।
१ जुनमा आइसेनहोवर पार्कमा अभ्यास खेल पनि हुनेछ। उक्त अभ्यास खेलमा बंगलादेश र भारत भिड्ने छन्। प्रतियोगितामा भारतीय टोलीले न्यूयोर्कमा ९ जुनमा हुने भारत-पाकिस्तानबीचको महत्त्वपूर्ण खेलसहित तीन खेल खेल्नेछ।
आइसेनहोवर पार्कलाई एक स्टेडियममा रूपान्तर गर्ने काम ५ महिना पहिलेदेखि शुरू भएको थियो। यसका लागि फ्लोरिडामा कृत्रिम पिच डिजाइन गरिएको थियो। त्यसपछि मुख्य स्टेडियम र अभ्यास क्षेत्रमा पिच राखिएको थियो।
मुख्य मैदानमा १० पिच र मैदाननजिकै ६ पिच राखिएका छन्। पिचहरू एडिलेड ओभल टर्फ सोलुसनका प्रमुख र एडिलेड ओभलका प्रमुख क्युरेटर डेमियन हगले डिजाइन गरेका हुन्।
मैदानको आउटफिल्ड क्षेत्र अमेरिकाको ल्यान्डटेक समूहले तयार गरेको हो। जसले बेसबलमा न्यूयोर्क यान्कीज, न्यूयोर्क मेट्स र फुटबलमा इन्टर मियामीका लागि मैदान तयार गर्दै आएको छ।
