विराटनगर। तेस्रो संस्करणको मिल्स कप टी–२० क्रिकेट प्रतियोगितामा भारत विहारस्थित पटनाको हाइ पफमेन्स क्रिकेट क्लब अन्तिम ८ मा पुगेको छ।
विराटनगर जुट मिलको खेल मैदानमा मंगलबार भएको पहिलो खेलमा विभागीय टोली नेपाल पुलिस क्लबलाई १२ रनले हराउँदै पटना अन्तिम ८ मा पुगेको हो।
पटनाले दिएको १०४ रनको विजय लक्ष्य पछ्याएको नेपाल पुलिसले १७.३ ओभरमा सबै विकेट गुमाई ९१ रन मात्रै बनाउन सक्यो। पुलिसका केशवले २० बलमा १७ रन बनाए। उनले ३ चौका मात्रै हिर्काए। एरनले १६ रन बनाउँदा सुबपले ११ रनको योगदान दिए। पुलिसका अन्य ब्याट्सम्यानले दोहोरो अंक बनाउन सकेनन्।
टस जितेर ब्याटिङ रोजेको पटनाले १५.५ ओभरमा सबै विकेट गुगाउँदै १०३ रन बनाएको हो। पटनाका सचिन कुमार सिंहले १९ बलमा २६ रन बनाए। उनले २ छक्का र २ चौका हिर्काए। प्रतिकले २२ रन पारी खेल्दा सहिले अविजित १३ रनको योगदान दिए। पटनाका अन्य ब्याट्सम्यानले दोहोरो अंक बनाउन सकेनन्।
पुलिसका सर्वण यादवले कसिलो बलिङ गरे। उनले ३.५ ओभरमा ९ रन खर्चेर ४ विकेट लिए। रोशन सुवलले ३ ओभरमा २२ रन खर्चेर ३ विकेट लिए भने रसिब खानले ४ ओभरमा ३० रन खर्चेर ३ विकेट लिए।
पटनाका सकबुल जैनले ४ ओभरमा २३ रन खर्चेर ३ विकेट लिए। सचिन सिंह र हरिले समान २/२ विकेट लिए। खेलको प्लेअर अफ दी म्याच पटनाका सचिन सिंह घोषित भए। उनले ३ हजार रुपैयाँ पाए।
