काठमाडौँ। खराब फर्मसँग संघर्ष गरिरहेको लखनउ सुपर जायन्ट्सले इन्डियन प्रिमियर लिग (आईपीएल)को प्लेअफ दौडलाई जीवितै राख्न मंगलबार दिल्ली क्यापिटल्सको सामना गर्नेछ।
लखनउको नकआउटमा पुग्ने सम्भावना थोरै छ। दिल्लीका कप्तान ऋषभ पन्त एक खेलको निलम्बनपछि लखनउविरुद्धको खेलबाट पुनरागमन गर्दैछन्। दिल्लीले पनि प्लेअफ दौडमा रहन कुनै पनि हालतमा लखनउलाई जित्नुपर्ने हुन्छ।
बुधबार सनराइजर्स हैदरावादसँग १० विकेटको हारपछि केएल राहुलको भविष्यको बारेमा धेरै अनुमानहरू भइरहेका छन्। टोली छाड्नुअघि राहुलले अन्तिम दुई खेलमा कप्तानीको जिम्मेवारी छाड्न सक्ने या कप्तानीको जिम्मेवारी लिन सक्ने अनुमान गरिएको छ। दुबै अवस्थामा राहुल ब्याटमार्फत जवाफ दिन चाहन्छन् र उच्च नोटमा सिजनको अन्त्य गर्न चाहन्छन्।
राहुल यस सिजन राम्रो लयमा छैनन् र भारतको आईसीसी टी-२० विश्वकप टोलीमा पनि स्थान बनाउन सकेनन्। लखनउ १२ अंकका साथ सातौँ स्थानमा छ। हाल दिल्ली र रोयल च्यालेन्जर्स बेंग्लोर शीर्ष चारभन्दा बाहिर छन्। दिल्ली र बेंग्लोरको पनि १२–१२ अंक छ।
स्टोइनिस र पूरनको जिम्मेवारी
राहुलबाहेक क्विन्टन डी ककको खराब फर्मका कारण लखनउले हालको सिजनमा पावरप्लेमा संघर्ष गर्नुपरेको छ। जसका कारण मार्कस स्टोइनिस र निकोलस पूरनजस्ता खेलाडीमाथि निकै दबाब थपिएको छ।
अन्तिम खेलमा पूरन र आयुष बडोनी टोलीलाई चुनौतीपूर्ण स्कोरमा पुर्याउन सफल भए पनि ट्राभिस हेड र अभिषेक शर्माको ओपनिङ जोडीले ९.४ ओभरमा १६७ रनको लक्ष्य पूरा गर्दै सनराइजर्स हैदराबादलाई जित दिलाएका थिए। जुन टी-२० मा सबैभन्दा छिटो पूरा भएको लक्ष्य हो।
पन्तको पुनरागमन
एक खेलको निलम्बनपछि कप्तान ऋषभ पन्तले टोलीमा पुनरागमन गरेका छन्। दिल्लीले लखनउविरुद्ध फिल्डिङमा सुधार गर्नुपर्नेछ। बेंग्लोरविरुद्धको खेलमा दिल्लीका खेलाडीहरूले धेरै क्याच छोडेका थिए।
दिल्लीका ब्याट्सम्यानहरूले पावरप्लेमा ४ ओभरमा ४ विकेट गुमाएका थिए। त्यसैले आईपीएलमा दिल्ली १४० रनको न्यूनतम स्कोरमा रोकिएको थियो। तर, दिल्लीले जारी सिजनमा ४ पटक २०० भन्दा बढी रन बनाएको छ।
टोलीले प्लेअफमा पुग्ने आफ्नो आशा कायम राख्न यो प्रदर्शन दोहोर्याउन पर्नेछ। ज्याक फ्रेजर म्याकगुर्कले ७ खेलमा २३७.४१ को स्ट्राइक रेटमा ३३० रन बनाएर टिमका सबैभन्दा प्रभावकारी ब्याट्सम्यान बनेका छन्।
