विश्वकपमा नेदरल्यान्ड्सको कप्तानी एडवर्ड्सले गर्ने

काठमाडौँ। अर्को महिना अमेरिका र वेस्ट इन्डिजमा हुने टी–२० विश्वकपका लागि नेदरल्यान्ड्सले टोली घोषणा गरेको छ। १५ सदस्यीय टोलीको नेतृत्व अनुभवी स्कट एडवर्ड्सले गर्ने भएका छन्। यो प्रतियोगिता जुन १ गतेदेखि आयोजना हुनेछ। 

रोयल डच क्रिकेट एसोसिएसनले गत मार्चमा आयोजक नेपाल र नामिबियाबीचको त्रिकोणात्मक टी–२० शृंखलामा सामान्य प्रदर्शन गरेका २७ वर्षीय एडवर्ड्सलाई कप्तानी जिम्मेवारी सुम्पिएको हो।

नेदरल्यान्ड्सका लागि उनले ५६ टी–२० अन्तर्राष्ट्रिय खेलमा १२२ को स्ट्राइक रेटमा ६७१ रन बनाएका छन्। भारतीय मूलका क्रिकेटर तेजा निदामानुरु, विक्रम सिंह र आर्यन दत्तलाई पनि टोलीमा समावेश गरिएको छ। 

तर, कोलिन एकरम्यान भने टोलीमा अटाएका छैनन्। टोलीका मुख्य प्रशिक्षक रायन कुकले भने, ‘हामीले सन्तुलित टोली छनोट गरेका छौँ। यो टोलीले अमेरिका र वेस्ट इन्डिजको अवस्थामा राम्रो प्रदर्शन गर्नेमा विश्वस्त छौँ। सबै खेलाडीहरूले राम्रो प्रशिक्षण गरिरहेका छन्।’

सन् २०२२ मा भएको टी–२० विश्वकप र गत वर्ष भारतमा भएको एक दिवसीय विश्वकपपछि नेदरल्यान्ड्स ले लगातार तेस्रो पटक आईसीसीको प्रतियोगितामा भाग लिइरहेको छ। 

नेदरल्यान्ड्स समूह ‘डी’ मा रहेको छ। नेदरल्यान्ड्सले ४ जुनमा नेपालसँग खेल्दै विश्वकप शुरू गर्ने छ। यो खेल डलासमा हुने छ।

चार दिनपछि नेदरल्यान्ड्सले न्यूयोर्कमा दक्षिण अफ्रिकाको सामना गर्नेछन्। समूहको अन्तिम दुई खेल १३ जुनमा बंगलादेश र १७ जुनमा श्रीलंकासँग हुनेछ। 

नेदरल्यान्ड्सको टोली :
स्कट एडवार्ड्स (कप्तान), आर्यन दत्त, बास डी लिडे, ड्यानिल डोरम, फर्द क्लासेन, लोगन भान बिक, म्याक्स ओडउड, माइकल लेभिट, पल भान मिर्केन, साइब्रान्ड एंगेलब्रेक्ट, तेजा निडामानिरु, टिम प्रिंगल, विक्रमजित सिंह, भीभीएन किंग्मा र वेस्ली ब्यारेसी ।