चेन्नईसँगै प्लेअफमा पुग्ने बेंग्लोरको सम्भावना कति?

काठमाडौँ। इन्डियन प्रिमियर लिग (आईपीएल)अन्तर्गत आइतबार सम्पन्न खेलमा चेन्नई सुपर किंग्स र रोयल च्यालेन्जर्स बेंग्लोरले जित हासिल गर्दै प्लेअफ यात्रालाई रोमाञ्चक मोडमा पुर्‍याएका छन्। 

६२ खेलपछि एउटा टोली (कोलकाता नाइट राइडर्स) ले मात्र प्लेअफमा आफ्नो स्थान सुरक्षित गरेको छ। यस्तो अवस्थामा बाँकी तीन स्थानका लागि ७ टोलीबीच प्रतिस्पर्धा भइरहेको छ। 

आइतबार बेंग्लोरले दिल्ली क्यापिटल्सविरुद्ध ४७ रनको जित हासिल गर्दै प्लेअफको आशा जीवितै राखेको छ। यता, चेन्नईले पनि राजस्थान रोयल्सलाई ५ विकेटले पराजित गर्दै आफ्नो सम्भावना कायमै राखेको छ।

लिगमा १/१ खेल खेल्न बाँकी रहेको चेन्नई र बेंग्लोर दुवै प्लेअफमा पुग्न सक्छन् कि सक्दैनन् भन्ने खुलदुली समर्थकहरूमा पनि होला। १२ अंक जोडेको बेंग्लोर अंक तालिकाको पाँचौँ स्थानमा छ। 

अब बेंग्लोरले अन्तिम खेल जित्नैपर्ने हुन्छ। बेंग्लोरले समूह चरणको अन्तिम खेलमा मे १८ मा चेन्नईको सामना गर्नेछ। यदि फाफ डु प्लेसिसको टोलीले चेन्नईलाई पहिले ब्याटिङ गर्दै हरायो भने उसको नेटरनरेट चेन्नईभन्दा राम्रो हुनेछ। 

यसबाहेक बेंग्लोरले आफ्नो खातामा १४ अंक पुर्‍याउने छ। यसबाहेक बेंग्लोरले सनराइजर्स हैदरावाद र लखनउ सुपर जायन्ट्सको खेलमा पनि भर पर्नुपर्नेछ। यदि केएल राहुलको टोली लखनाउनले दुई खेलमध्ये एकमा मात्र जित हात पार्‍यो र दिल्ली–गुजरात जायन्ट्सको नेटरनरेट कमजोर रह्यो भने शनिबार बेंग्लोर र चेन्नईबीच प्रतिस्पर्धात्मक खेल देख्न पाइने छ।

१३ खेलमा ७ जित हासिल गर्दै चेन्नई १४ अंकसहित तालिकाको तेस्रो स्थानमा छ। चेन्नईले आफ्नो अन्तिम खेल बेंग्लोरसँग खेल्ने छ। यदि ऋतुराज गायकवाडको टोलीले यो खेलमा जित हात पार्‍यो भने प्लेअफमा स्थान बनाउने छ। तर, चेन्नईले खेल हारेमा नेटरनरेटमा भर पर्नुपर्ने हुन्छ।

शीर्ष ४ मा पुग्न बेंग्लोर-चेन्नईको समीकरण 

यदि बेंग्लोरले आफ्नो अर्को खेलमा चेन्नईलाई थोरै अन्तरले हरायो भने उसले १४ अंक पुग्ने छ। यस्तो अवस्थामा चेन्नईको नेटरनरेटमा खासै असर पर्ने छैन। त्यसपछिका दुई खेलमा लखनउले एकमा मात्र जित हात पार्नुपर्ने हुन्छ। 

लखनउले मंगलबार दिल्लीको सामना गर्नेछ। १७ मेमा भने लखनउले मुम्बई इन्डियन्सको सामना गर्नेछ। यदि दिल्लीले लखनउलाई हरायो भने उसको खातामा १४ अंक हुनेछ।

हैदरावादले दुवै खेलमा हार बेहोर्नु पर्नेछ। यस्तो अवस्थामा लखनउ १४ अंकमा रोकिने छ र नेटरनरेट पनि कमजोर हुने छ। यो अवस्थामा बेंग्लोर र चेन्नई १४ अंक र राम्रो नेटरनरेटका साथ शीर्ष ४ मा रहनेछन्। त्यस्तै, लखनउ र हैदरावादको खातामा १४–१४ अंक हुनेछ, तर उनीहरूको नेटरनरेट चेन्नई र बेंग्लोरको तुलनामा बलियो हुनेछैन।