विराटनगर। देव खनालको आक्रामक शतकसँगै विराटनगरको वाइआरसीसी क्रिकेट क्लब विराटनगरमा जारी तेस्रो संस्करणको मिल्स कप टी–२० क्रिकेट प्रतियोगिताको क्वार्टरफाइनलमा पुगेको छ।
विराटनगर जुट मिलको खेल मैदानमा सोमबार सम्पन्न पहिलो खेलमा वीरगन्ज यूथ स्पोट्स एकेडेमीलाई ५४ रनले हराउँदै विराटनगर क्वार्टरफाइनलमा पुगेको हो।
विराटनगरले दिएको २४३ रनको लक्ष्य पछ्याएको वीरगन्जले निर्धातिर १७ ओभरमा ५ विकेट गुमाउँदै १६८ रन मात्रै बनाउन सक्यो। वीरगन्जका असप हुसेनले अर्धशतक पूरा गरे। ३० बलमा ५ छक्का र ५ चौका हिर्काउँदै ५१ रन बनाए।
हिसुब मन्सुरीले १२ बलमा अविजित २३ रन पारी खेल्दा हन्थन यादवले २३ रनको योगदान दिए। विराटनगरका विक्रम दासले ४ ओभरमा १६ रन खर्चिएर ३ विकेट लिए। भोजराज भट्टले २ विकेट र हेमन्त धामीले १ विकेट लिए।
त्यसअघि टस जितेर ब्याटिङ रोजेको विराटनगरले निर्धारित १७ ओभरमा ६ विकेट गुमाउँदै २४२ रन बनाएको थियो। विराटनगरका ओपनर देव खनालले शतक पूरा गरे। उनले ३० बलमा १२ छक्का र ६ चौका प्रहार गर्दै १०२ रन बनाए।
राष्ट्रिय खेलाडीले भरिएको विराटनगरका नारायण जोशीले अविजित १३ बलमा ३३ रन बनाए। उनले ४ छक्का र १ चौका हिर्काए। इमरन नजिर र अभिषेक पलले समान २५/२५ रनको इनिङ्स खेल्दा सन्दीप खत्रीले ९ बलमा २६ रनको योगदान दिए। दीपिन खत्रीले अविजित ९ बलमा १४ रन जोडे भने सविप अन्सारीले ८ बलमा १६ रन बनाए।
वीरगन्जका सोनुले २, नितेश पटेल, सोनु शर्माले समान १/१ विकेट लिए। प्रतियोगिताको प्लेअर अफ दी म्याच सर्वाधिक रन बनाउने खेलाडी विराटनगरका देव खनाल घोषित भए। उनले तीन हजार रुपैयाँ पाए।
