काठमाडौँ। दिल्ली क्यापिटल्सका कप्तान ऋषभ पन्त एक खेलको प्रतिबन्धमा परेका छन्।
७ मेमा दिल्लीमा भएको राजस्थान रोयल्सविरुद्धको खेलमा दिल्लीले निर्धारित समयमा २० ओभर पूरा गर्न सकेको थिएन। त्यसैले पन्तलाई स्लो ओभर रेटका कारण प्रतिबन्ध लगाइएको हो।
आइतबार रोयल च्यालेन्जर्स बेंग्लोरविरुद्धको खेलमा पन्तले खेल्ने छैनन्। टोलीका मुख्य प्रशिक्षक रिकी पोन्टिङका अनुसार यस खेलमा अक्षर पटेल दिल्लीको कप्तानी गर्नेछन्।
आईपीएल नियमअनुसार प्रत्येक टोलीलाई २० ओभर पूरा गर्न ८५ मिनेट (४.२८ मिनेट/ओभर) दिइएको छ। तर, दिल्लीले राजस्थानविरुद्ध ११७.८२ मिनेट लिएको थियो।
यसबाहेक पन्तलाई ३० लाख भारू जरिवाना गरिएको छ भने इम्प्याक्ट खेलाडीसहित दिल्ली इलेभेनका अन्य खेलाडीले पनि १२ लाख भारू या म्याच फीको ५० प्रतिशत जरिबाना तिर्नुपर्नेछ। आईपीएलको यो सिजन पन्तको यो तेस्रो स्लो ओभर रेट हो।
बेंग्लुरुविरुद्धको यो खेल दिल्लीका लागि धेरै महत्त्वपूर्ण छ। दिल्लीले प्लेअफ सम्भावना कायम राख्न यो खेल ठूलो अन्तरले जित्नुपर्ने हुन्छ।
