काठमाडौँ। मुम्बई इन्डियन्सलाई पराजित गर्दै कोलकाता नाइट राइडर्स इन्डियन प्रिमियर लिग (आईपीएल)को प्लेअफमा पुगेको छ। शनिबार राति सम्पन्न खेलमा कोलाकाता १८ रनले विजयी भएको हो।
जितसँगै १२ खेल खेलेको कोलकाताले १८ अंक जोडेको छ। शीर्ष स्थानमा रहेको कोलकाताले दुई खेल खेल्न बाँकी रहेको छ। पराजित मुम्बईको भने यो नवौँ हार हो। नवौँ स्थानमा रहेको मुम्बईको १३ खेलबाट ८ अंक छ।
मुम्बई यसअघि नै प्लेअफ दौडबाट बाहिरिसकेको छ। कोलकाताले दिएको १५८ रनको लक्ष्य पछ्याएको मुम्बईले निर्धारित १६ ओभरमा ८ विकेट गुमाउँदै १३९ रन मात्रै बनाउन सक्यो।
मुम्बईका ओपनर इशान किशनले सर्वाधिक ४० रन बनाए। २२ बल खेलेका उनले ५ चौका र २ छक्का प्रहार गरे।
तिलक वर्मा ३२, रोहित शर्मा १९ र नमन धीर १७ रनमा आउट हुँदा अंशुल कन्बोज २ र पीयुष चावला १ रमा अविजित रहे।
कोलकाताका आन्द्रे रसेल, वरुण चक्रवर्ती र हर्षित राणाले २/२ विकेट लिए। सुनील नारायणको नाममा १ विकेट रह्यो।
त्यसअघि इर्डन गार्डेनमा टस हारेर पहिला ब्याटिङ गरेको कोलकाताले निर्धारित १६ ओभरमा ७ विकेट गुमाउँदै १५७ रन बनाएको थियो। वर्षका कारण खेल १६ ओभरमा झारिएको थियो।
कोलकाताका वेंकटेश अय्यरले सर्वाधिक ४२ रन बनाए। २१ बल खेलेका उनले ६ चौका र २ छक्का प्रहार गरे।
नितिश राणा ३३, आन्द्रे रसेल २४ र रिन्कु सिंह २० रनमा आउट हुँदा रमनदीप सिंह १७ र मिचेल स्टार्क २ रनमा अविजित रहे।
मुम्बईका जसप्रीत बुमराह र पीयुष चावलाले २/२ विकेट लिए। नुवान तुषारा र अंशुल कन्बोजको नाममा १/१ विकेट रह्यो।
