विराटनगर। तेस्रो संस्करणको मिल्स कप टी–२० क्रिकेट प्रतियोगितामा भारतको दिल्ली क्रिकेट क्लब र विराटनगरको एनबीएससी क्रिकेट क्लब विजयी शुरूआत गरेका छन्।
विराटनगर जुट मिलको खेल मैदानमा शनिबार भएको उद्घाटनको पहिलो खेलमा दिल्लीले हरियाण थन्डर्स क्रिकेट क्लबलाई ५९ रनले हराउँदै दिल्ली दोस्रो चरणमा प्रवेश गरेको हो।
टस जितेर ब्याटिङ रोजेको दिल्लीले निर्धातिर २० ओभरमा ६ विकेटको क्षतिमा २४५ रनको विशाल योगफल खडा गर्यो। दिल्लीको जितको लागि मोहित अभिचानोनी र शिवम किशोरले आक्रामक ब्याटिङ गरे।
खेलको प्लेअर अफ दी म्याचसमेत घोषित भएका मोहितले ३८ बलमा ९७ रन बनाए। शतकनजिक स्कोर पुर्याउँदै उनले ९ छक्का र ८ चौका हिर्काए। शिवम अविजित रहँदै २५ बलमा अर्धशतक कटाए। उनले ७ छक्का र ६ चौका हिर्काउँदै ७२ रन जोड्दा भरत कार्कीले २४ बलमा २९ रनको योगदान दिए।
हरियाण थन्डर्स क्रिकेट क्लबका अंकित गोसामीले ३ ओभरमा ३४ रन खर्चिएर ४ विकेट लिए। मोहितले २ विकेट र सुभमले १ विकेट लिए।
२४६ रनको विशाल लक्ष्य पछ्याएको हरियाणले १९ ओभरमा सबै विकेट गुमाई १८६ रनमा सीमित भयो। संगमले अविजित ३३ रन बनाउँदा टिस्मू कुमारले २८ रन जोडे।
दिल्लीका सत्यजीले ४ ओभरमा ३९ रन खर्चिएर ३ विकेट लिए। मोहितले २ ओभरमा ३७ रन खर्चिएर २ विकेट लिए।
सोही दिन भएको दोस्रो खेलमा झापाको बोष्र्टन क्रिकेट क्लबलाई एनबीएससीले २१३ रनले पराजित गर्यो। टस हारेर ब्याटिङ गरेको एनबीएससीले निर्धारित २० ओभरमा ५ विकेट गुमाई २८८ रनको विशाल योगफल खडा गर्यो।
एनबीएससीका जितका लागि राहुल चौधरीले विस्फोटक ब्याटिङ गरे। उनले ३६ बलमा ९ छक्का र ६ चौका हिर्काउँदै सर्वाधिक ८३ रन बनाए। चिरन्जीवि ठाकुरले २९ बलमा अर्धशतक कटाउँदै ६० रन बनाए। उनले ३ छक्का र ८ चौकका प्रहार गरे।
कुनाल किशोरले २० बलमा अविजित ५७ रन बनाए। उनले ४ छक्का र र ७ चौकका हिर्काए। अनुभव कुमारले ४३ र रिसभले २९ रन बनाए। बोष्र्टनका सन्दीप क्षेत्रीले, दिवश शर्मा र प्रजित कुमारले समान १/१ विकेट लिए।
२८९ रनको विशाल लक्ष्य पछ्याएको बोष्र्टनले १४.६ ओभरमा सबै विकेट गुमाई ७५ रनमा सीमित भयो। तरु शर्माले अविजित २५ रन बनाउँदा अन्य ब्याट मेनले दोहोरो अंक बनाउन सकेनन्।
एनबीएससीका मैनक कुमारले ४ ओभरमा २५ रन खर्चिएर ४ विकेट लिए। उदय झाले ३ विकेट लिए। प्लेर अफ दी म्याच एनबीएससीका सर्वाधिक रन बनाउने राहुल चौधरी घोषित भए।
आइतबारको पहिलो खेल जोगवनीको प्रशान्त क्रिकेट क्लब र विराटनगरको सीसीए क्रिकेट क्लबबीच हुनेछ। सोही दिन हुने दोस्रो खेल आयोजक मिल्स क्रिकेट क्लब र सुनसरी क्रिकेट क्लब क्बलबीच हुनेछ।
