काठमाडौँ। इङ्ग्ल्यान्डका तीव्रगतिका बलर जेम्स एन्डरसनले सन्न्यास लिने भएका छन्। एन्डरसन यस वर्षको शुरूमा भारत भ्रमणमा गएका थिए।
भारत भ्रमणमा रहँदा उनी ७०० टेस्ट विकेट लिने विश्वको तेस्रो बलर बनेका थिए। तर, उनले ७ इनिङ्समा ११० ओभर मात्र बलिङ गरेका थिए।
एन्डरसनले जुलाईमा वेस्ट इन्डिजविरुद्धको घरेलु टेस्ट शृंखला खेल्दा ४२ वर्ष पूरा गर्नेछन्। त्यसपछि उनले श्रीलंकाविरुद्धको टेस्ट शृंखलामा सन्न्यास लिन सक्नेछन्।
श्रीलंकाविरुद्धको टेस्ट शृंखलाको पहिलो खेल अगस्टको अन्त्यमा घरेलु मैदान ओल्ड ट्राफोर्डमा खेलाइनेछ।
एन्डरसन अहिले काउन्टी क्रिकेट खेलिरहेका छैनन्। वर्कलोड म्यानेजमेन्टका कारण मे महिनाको अन्त्यसम्ममा मात्र उनले काउन्टी म्याच खेल्न पाउने बताइएको छ।
