पोखरामा बिहीबारदेखि खुला ब्याडमिन्टन प्रतियोगिता

पोखरा। पोखरामा बिहीबारदेखि खुला अन्तर विद्यालयस्तरीय मोहन मेमोरियल तथा पोखरा महानगरस्तरीय ब्याडमिन्टन प्रतियोगिता हुने भएको छ। 

पोखरा महानगर खेलकुद विकास समिति तथा मोहन भूगोल ब्याडमिन्टन फाउन्डेसनको संयुक्त आयोजनामा प्रतियोगिता बैशाख २७ देखि २९ गतेसम्म हुन लागेको मंगलबार पोखरामा पत्रकार सम्मेलनको आयोजना गर्दै जानकारी दिइएको हो। 

मोहन भूगोल ब्याडमिन्टन फाउन्डेसनका अध्यक्ष भुवन गुरुङले खुला प्रतियोगितामा छात्रछात्रा यू–१३, यू–१९ उमेरसमूह र पोखरा महानगरपालिकास्तरीयमा एकल र युगल विधामा प्रतिस्पर्धा हुने बताए। 

उनका अनुसार विद्यालयस्तरीय निमावि तर्फ यू–१३ उमेर समूह र माध्यमिकतर्फ यू–१९ उमेर समूहका छात्रछात्राले प्रतिस्पर्धा गर्नेछन्। यस्तै, पोखरा महानगरपालिकास्तरीयमा अन्तरवडा एकल र युगलतर्फ महिला/पुरुषले प्रतिस्पर्धा गर्नेछन्। 

खुला अन्तर विद्यालयस्तरीय मावि यू–१९ उमेरसमूह छात्रछात्रा विजेता, उपविजेता र तृतीय हुनेले क्रमशः ३०, २० र १० हजार रुपैयाँसहित मेडल प्रमाणपत्र र ट्रफी प्राप्त गर्नेछन्। 

यस्तै, खुला अन्तर विद्यालयस्तरीय यू–१३ र यू–१९ उमेरसमूहका सर्वोत्कृष्ट खेलाडीले साइकल पुरस्कार पाउने फाउन्डेसनका अध्यक्ष गुरुङले बताए। यू–१३ का विजेता खेलाडी ब्याडमिन्टन खेलका गिफ्ट ह्याम्पर प्राप्त गर्नेछन्। 

पोखरा महानगरपालिकास्तरीय एकल र युगलतर्फको विजेता, उपविजेता र तृतीय हुनेले क्रमशः ३०, २० र १० हजार रुपैयाँसहित मेडल प्रमाणपत्र र ट्रफी प्राप्त गर्ने सचिव बदान ताङ्गवे लामाले बताए। प्रतियोगिता पोखरा रंगशालाको ब्याडमिन्टन कोर्टमा सञ्चालन हुनेछ। बिहीबारबाट शुरू हुने प्रतियोगितामा देशभरबाट करिब ४ सय खेलाडीहरूको सहभागिता रहने आयोजकले दाबी गरेको छ। 

यस्तै, गत वर्ष सम्पन्न भएको ब्याडमिन्टन प्रतियोगितामा उत्कृष्ट प्रदर्शन गरेका ११ खेलाडीहरूले जापानमा प्रशिक्षणसँगै मैत्रीपूर्ण खेल खेल्ने अवसर समेत प्राप्त गरेका छन्। प्रतियोगितामा उत्कृष्ट प्रदर्शन गरेका ११ खेलाडीहरूले जापानको नागाकाओ शहरमा प्रशिक्षण र वाकाभा कप र यू–१३ को प्रशिक्षणमा सहभागीसमेत हुन पाएको अध्यक्ष गुरुङले बताए।