चोट बोकेर खेलिरहेका धोनी

काठमाडौँ। चेन्नई सुपर किंग्सका पूर्वकप्तान महेन्द्रसिंह धोनी आइतबार पञ्जाब किंग्सविरुद्धको खेलमा नवौँ नम्बरमा ब्याटिङ गर्न आएका थिए। सामान्यतया उनी छैटौँ या सातौँ नम्बरमा ब्याटिङ गर्न आउँछन्।

खेलको पहिलो इनिङ्समा टोलीको कमजोर स्थितिका बाबजुद बलिङ अलराउन्डर मिचेल सान्टनर र शार्दुल ठाकुर धोनीभन्दा अगाडि ब्याटिङ गर्न आएपछि समर्थक र क्रिकेट विज्ञहरूले चर्को आलोचना गरेका थिए।

तर, मिडिया रिपोर्टका अनुसार धोनी ढिलो आउनुको कारण उनको चोट हो। धोनीको खुट्टाको मांसपेशीमा चोट लागेको छ। जसका कारण उनी मैदानमा लामो समयसम्म दौडन सक्दैनन्। त्यसैले उनी नियमित स्थानमा ब्याटिङ गर्न नआएका हुन्।

केही खेलअघि धोनीले ‘नन स्ट्राइकर’ डेरिल मिचेललाई रन लिन अस्वीकार गरेका थिए। मिचेल ‘नन स्ट्राइक’बाट दौडिएर धोनीसम्म पुगेका थिए। त्यसपछि उनी आफ्नै स्थानमा फर्किए। त्यसपछि धोनीको आलोचना भएको थियो। उक्त खेलमा धोनी रनआउट भए। यसलाई धोनीको चोटसँग पनि जोडिएको छ।

धोनीले मैदानमा आउनुअघि औषधि सेवन गरिरहेको र चोट नबढोस् भनेर आफ्नो रनिङ कम गर्ने कोसिस गरिरहेको बताइएको छ। डाक्टरले आराम गर्न सल्लाह दिए पनि धोनीसँग खेल्नुबाहेक अर्को विकल्प छैन।

‘धोनीलाई आराम दिइन्थ्यो,’ टाइम्स अफ इन्डियाले एक स्रोतलाई उद्धृत गर्दै लेखेको छ,‘हामी हाम्रो ‘बी’ टोलीलाई खेलाइरहेका छौँ। धोनीको आलोचना गर्नेहरूलाई थाहा छैन कि उनले यो टोलीका लागि कति त्याग गरिरहेका छन्।’

टोलीका दोस्रो विकेटकिपर ब्याट्सम्यान डेभोन कोन्वे उपलब्ध भएको भए धोनीले केही म्याचबाट आराम लिने थिए। गत फेब्रुअरीमा अस्ट्रेलियाविरुद्धको टी–२० शृंखलाका क्रममा कोन्वे घाइते भएका थिए। यही कारण उनी आईपीएल अघि नै टोलीबाट बाहिरिए।

आईपीएल २०२३ को फाइनलपछि गत जुन १ मा मुम्बईको धीरुभाई अम्बानी अस्पतालमा धोनीको घुँडाको शल्यक्रिया गरिएको थियो। धोनीको शल्यक्रिया डाक्टर दिनशा पार्दीवालाले गरेका थिए। उनले ऋषभ पन्त र टोकियो ओलम्पिकका स्वर्ण पदक विजेता नीरज चोपडाको पनि शल्यक्रिया गरिसकेका छन्।

यस सिजन चेन्नईका धेरै खेलाडी चोटसँग संघर्ष गरिरहेका छन्। कोन्वे यस सिजनबाट बाहिरिइसकेका छन् भने माथिशा पाथिराना पनि चोटका कारण श्रीलंका फर्किएका छन्। तीव्रगतिका बलर दीपक चाहर पनि खुट्टाको चोटका कारण टोलीबाट बाहिरिएका छन्।