काठमाडौँ। आगामी जुनमा अमेरिका र वेस्ट इन्डिजमा आयोजना हुने आईसीसी टी–२० विश्वकपका लागि छनोट भएको भारतीय क्रिकेट टोलीमा कप्तान रोहित शर्माको मागअनुसार चार स्पिनरलाई मौका दिइएको छ।
रोहितले मुम्बईमा पत्रकारसँग कुरा गर्दै भने, ‘विपक्षी कप्तानले पनि यो कुरा सुन्नेछन्, त्यसैले म विस्तारमा सबै कुरा भन्न चाहन्नँ। हामी क्यारेबियनमा धेरै क्रिकेट खेल्छौँ। त्यसैले हामीलाई परिस्थिति थाहा भएको कारण मलाई चार स्पिनर चाहिएको थियो।’
भारतीय टोलीमा कुलदीप यादव, युजवेन्द्र चहल, रविन्द्र जडेजा र अक्षर पटेल रहेका छन्। टोलीमा तीन जना तीव्रगतिका बलरले मात्र स्थान पाएका छन्। जसका कारण रिंकु सिंह पनि रिजर्भ खेलाडीको रूपमा बस्न परेको छ। भारतका पछिल्ला दुई शृंखलामा सहभागी नभए पनि चहलले इन्डियन प्रिमियर लिग (आईपीएल)मा उत्कृष्ट प्रदर्शन गर्दै टोलीमा स्थान सुरक्षित गरेका हुन्।
चार स्पिनर छनोटबारे रोहितले भने, ‘ब्याटिंग गर्न सक्ने दुई स्पिनर र आक्रामक बलिङ गर्ने दुई स्पिनर टोलीमा छन्। त्यसैले टोली सन्तुलन छ।’
