काठमाडौँ। अखिल नेपाल फुटबल संघ (एन्फा)का उपाध्यक्ष दावा लामा पक्राउ परेका छन्।
लागुऔषध खैरो हिरोइन कारोबार मुद्दामा १६ वर्षदेखि फरार रहेका दावालाई काठमाडौँ उपत्यका अपराध अनुसन्धान कार्यालयको टोलीले पक्राउ गरेको हो। उनी काठमाडौँबाटै पक्राउ परेका हुन्।
सर्लाही घर भई काठमाडौँ बस्दै आएका दावाले लागुऔषधको कारोबार गर्दै आएको सूचनाका आधारमा प्रहरीले २०६१ साउन ८ गते काठमाडौँ महानगरपालिका–१६, बालाजु वनस्थली चोकनजिकबाट ५ ग्राम खैरो हेरोइनसहित पक्राउ गरेको थियो। प्रहरीले पक्राउ गर्दा उनको साथबाट खैरो हेरोइन बरामद भएको थियो। पक्राउ परेपछि उनले बिक्री वितरणकै लागि त्यो लागुऔषध राखेको बयान दिएका थिए।
उनलाई २०६१ भदौ २५ गते काठमाडौँ जिल्ला अदालतले मुद्दा पुर्पक्षका लागि थुनामा पठाएको थियो। पछि २०६२ जेठ १० मा जिल्ला अदालतबाट ६ महिना मात्र कैद सजायको फैसला भएपछि उनी कारागारमुक्त भएका थिए।
तर, २०६४ जेठ २० गते न्यायाधीशद्वय अली अकवर मिकरानी र जनार्दनबहादुर खड्काको संयुक्त इजलासले काठमाडौँ जिल्ला अदालतले गरेको फैसला उल्ट्याउँदै दावालाई लागुऔषध खैरो हेरोइन कारोबारको मुद्दामा दोषी ठहर गर्दै पाँच वर्ष कैद सजाय र ५ हजार रुपैयाँ जरिबाना हुने फैसला सुनाएको थियो। अदालतको यो फैसलापछि उनी १६ वर्षदेखि फरार रहेका थिए।
गत चै २५ गते राष्ट्रिय खेलकुद परिषद् (राखेप)ले राष्ट्रिय खेलकुद विकास ऐन, २०७७ को दफा २२ को उपदफा ५ को देहाय (ङ) मा भएको कानूनी व्यवस्था बमोजिम दावालाई कुनैपनि खेल संघ महासंघमा निर्वाचित, मनोनित वा बहाल रहन सक्ने अवस्था नरहेको भन्दै कारबाही गर्न एन्फालाई पत्र पठाएको थियो।
उक्त पत्रमा दावाको सम्बन्धमा राष्ट्रिय खेलकुद विकास ऐन, २०७७ को उल्लेखित व्यवस्था आकर्षित नहुने भएमा सो को प्रमाण र कारण सहित साथै, निज त्यस संघको निर्वाचनबाट निर्वाचित भएको विषयमा समेत ७ (सात) दिन भित्र परिषद समक्ष लिखित जवाफ पेश गर्न एन्फालाई पत्रमा भनेको थियो। अन्यथा प्रचलित कानून बमोजिम आवश्यक कारवाही गर्ने चेतावनी राखेपले दिएको थियो।
.jpeg)
-1733993651.jpeg)
