काठमाडौँ। विराट कोहलीको शतकका बाबजुद इन्डियन प्रिमियर लिग (आईपीएल)रोयल च्यालेन्जर्स बेंगलुरू पराजित भएको छ।
शनिबार सम्पन्न खेलमा बेंगलुरू राजस्थान रोयल्ससँग ६ विकेटले पराजित भएको हो। जारी प्रतियोगितामा बेंगलुरूको यो चौथो हार हो।
५ खेल खेलेको बेंगलुरू चेन्नई सुपर किंग्ससँग ६, कोलकाता नाइट राइडर्ससँग ७ विकेट र लखनउ सुपर जायन्ट्ससँग २८ रनले पराजित भएको थियो।
बेंगलुरूले पन्जाब किंग्सलाई भने ४ विकेटले पराजित गरेको थियो। शतप्रतिशत जितसँगै राजस्थान ४ खेलबाट ८ अंक जोड्दै शीर्ष स्थानमा उक्लिएको छ।
पराजित बेंगलुरू ५ खेलमा एक जितसहित आठौँ स्थानमा रहेको छ। बेंगलुरूले दिएको १८३ रनको लक्ष्य पछ्याएको राजस्थानले ५ बल बाँकी रहँदा ४ विकेट गुमाउँदै १८९ रन बनायो।
राजस्थानका ओपनर जोश बटलरले अविजित रहँदै शतकीय इनिङ्स खेले। ५८ बलमा ९ चौका र ४ छक्का प्रहार गरेका उनले १०० रन बनाए।
सन्जु सामसनले ४२ बलमा ८ चौका र २ छक्कासहित ६९ रन बनाए। उनीहरूबीच दोस्रो विकेटका लागि ८६ बलमा १४८ रनको साझेदारी भएको थियो।
शिमरान हेटमायर ११ रनमा आविजत रहँदा अन्यले भने राम्रो प्रदर्शन गर्न सकेनन्। बेंगलुरूका रिस टोप्लीले सर्वाधिक २ विकेट लिए। यश दयाल र मोहम्मद सिराजको नाममा १/१ विकेट रह्यो।
त्यसअघि जयपुरको सवाई मानसिंह स्टेडियममा टस हारेर पहिला ब्याटिङ थालेको बेंगलुरूले निर्धारित २० ओभरमा ३ विकेट गुमाउँदै १८३ रन बनाएको थियो।
बेंगलुरूका ओपनर विराट कोहलीले अविजित रहँदै ११३ रनको इनिङ्स खेले। ७२ बल खेलेका उनले १२ चौका र ४ छक्का प्रहार गरे।
कप्तान फाफ डुप्लेसी ४४ रनमा आउट हुँदा क्यामरुन ग्रिन ५ रनमा अविजित रहे। राजस्थानका युजवेन्द्र चहलले २ र नान्द्रे बर्गरले १ विकेट लिए।
