लिजेण्ड कप क्रिकेटमा निभियाको जर्सी  

रुपन्देही । तिलोत्तमा एक्स्ट्राटेक लिजेण्ड कप क्रिकेट प्रतियोगिताको जर्सी सार्वजनीक गरिएको छ । 

शनिबार बुटवलमा पत्रकार सम्मेलनको आयोजना गरेर प्रतियोगितामा सहभागी हुने टिमले लगाउने जर्सी सार्वजनीक गरिएको हो । 

रुपन्देहीमा नीजि क्षेत्रको लगानीमा बनेको अन्तराष्ट्रिय क्रिकेट रंगशाला एक्स्ट्राटेक ओभलको उद्घाटन लिजेण्ड कप प्रतियोगिताको आयोजना गरेर हुदैछ । प्रतियोगितामा क्रिकेटका पुराना अन्तराष्ट्रिय खेलाडी सम्मिलित टिमले प्रतिस्पर्धा गर्नेछन् । 

प्रतियोगितामा निभिया किट पार्टनरको रुपमा जोडिएको छ । लिजेण्ड कपमा निभियाको जर्सी लगाएर खेलाडी मैदान उत्रने पत्रकार सम्मेलनमा जानकारी दिईयो ।

निभियालाई किट पार्टनरको रुपमा प्रतियोगितासँग जोडेका चाईना ट्रेड लिङ्कका प्रबन्ध निर्देशक राजन महर्जनले गौतम बुद्धको जन्मस्थल लुम्बिनीलाई अब क्रिकेटका कारणले समेत विश्वले चिन्ने विश्वास ब्यक्त गरे । ‘भैरहवा र लुम्बिनी क्षेत्र भगवान बुद्धको जन्मस्थलसँग संगै भविष्यमा हुने क्रिकेटका कारणले समेत विश्वले चिन्नेछ ।’ महर्जनले भने ।

सोमबारबाट रुपन्देहीमा सञ्चालन हुने लिजेण्ड कपमा लिजेन्ड्स ९६, रेस्ट अफ नेपाल, विश्कप २०१४ र रुपन्देही लिजेन्ड्स गरि चार टिमले खेल्नेछन् । टी १० संरचनामा हुने एक दिने प्रतियोगिताको किट पार्टनरको रुपमा निभिया जोडिएको छ ।

रुपन्देही लिजेन्ड्सको कप्तानी हरि थापाले गर्नेछन् भने विश्वकप २०१४ को कप्तानी पारस खड्काले गर्ने पत्रकार सम्मेलनमा जानकारी गराईएको थियो । रेस्ट अफ नेपालको कप्तानी विनोद दासले गर्दा लिजेन्ड्स ९६ को कप्तानी एलबी क्षेत्रीले गर्नेछन् ।

पत्रकार सम्मेलनलाई सम्बोधन गर्दै लुम्बिनी प्रदेश खेलकुद परिषद्का सदस्य सचिव जयप्रकाश भट्टराईले प्रतियोगिताको सफल आयोजनाका लागि शुभकामना दिए । उनले रुपन्देहीमा अन्तराष्ट्रिय स्तरको क्रिकेट रंगशाला बन्नु गौरवको विषयमा रहेको उल्लेख गर्दै प्रदेश सरकार आवश्यक सहयोग गर्न सधै तत्पर रहने बताए ।