बजेटमै रुमलियो एन्फा बैठक !

काठमाडौं । अखिल नेपाल फुटबल संघ एन्फाको कार्यसमिति बैठक वार्षिक बजेटको एजेण्डामै रुमलिएको छ ।

चालू आर्थिक वर्षको बजेट पारित गर्न बसेको कार्यसमिति बैठक वार्षिक बजेटको एजेण्डामै अल्झिएको हो । 

बिहीबार सुरु कार्यसमिति बैठकमा सदस्यहरुको गत आर्थिक वर्षको बजेटको अडिट रिपोर्टको माग गरेपछि छलफल स्थगित गरिएको थियो । शुक्रबार पुन बसेको कार्यसमिति बैठकमा सदस्यहरुले बजेटको सन्दर्भमा गम्भिर असहमती जनाएका छन् । 

आफुहरुसँग छलफलनै नगरि कार्यक्रम तथा बजेट कार्यसमिति बैठकमा पेश गरिएको भन्दै पदाधिकारी तथा सदस्यहरुको असहमती जनाएका हुन् । 

एन्फाले चालू आर्थिक वर्षको बजेट भन्दै अंग्रेजी वर्षको क्यालेन्डर कार्यसमिति बैठकमा प्रस्तुत गरेको छ । कार्यसमिति सदस्यहरुले अंग्रेजी वर्षको क्यालेन्डर पारित गराएर अर्को वर्षको बजेटमा आफुहरुलाई बाईपास गर्न खोजिएको आशंका ब्यक्त गरेका छन् ।

कार्यसमितिका एक सदस्यले कार्यसमिति बैठक दोस्रो एजेण्डा भन्दा तेस्रो एजेण्डामा सर्न नसकेको जानकारी दिए । 'तेस्रो एजेण्डामा बैठक छिर्न पाएको छैन । कुनैपनि पदाधिकारी, सदस्य र सरोकारवाला निकायसँग छलफलनै नगरि ल्याईएको बजेट कार्यक्रममा गल्ती देखिन्छ ।' तीन अधिकारीले भने ।

कार्यसमिति सदस्यका एजेण्डा बैठकमा नराखिएको भन्दै बिहिबारको बैठक निकै ढिला गरि सुरु भएको थियो । शुक्रबार समेत बैठकले कुनै एजेण्डामा ठोस निर्णय गर्न सकेन । शनिबारको बैठक दिउँसो १ बजेसम्म बस्न सकेको छैन । 

एन्फा प्रवक्ता सुरेश साहले बजेटको विषय निकैनै महत्वपुर्ण भएकाले छलफल लम्बिएको बताए ।

‘बजेट, अडिट रिपोर्ट, आर्थिकको एजेण्डा अलि ठुलो विषय पनि भयो । सदस्यहरुले समय लिएर छलफलमा सहभागी भएपछि बैठक लम्बिएको हो । सदस्यहरुले एजेण्डामा पर्याप्त रुपमा बोल्न पाउने उहाँहरुको अधिकारको विषय पनि भयो ।’ साहले भने ।

एन्फाले फागनु १४ गते नियमित साधारण सभा बैठक बोलाएको छ । सोही सभाबाट पारित गर्नका लागि बजेट कार्यसमिति बैठकबाट निर्णय गराउन खोजिएको हो । पर्याप्त छलफल बिनै बजेट कार्यसमिति बैठकमा प्रस्तुत गरिएपछि विवाद उत्पन्न भएको छ ।