नवलपुरमा मछिन्द्र स्तब्ध !

नवलपुर । राष्ट्रिय खेलाडीले भरिएको ए डिभिजनको मछिन्द्र क्लब राईनो संरक्षण गोल्डकप फुटबल प्रतियोगिताको क्वार्टरफाइनलबाट बाहिरिएको छ । 

शुक्रबार नवलपुरमा भएको प्रतियोगिताको तेस्रो क्वार्टरफाइनलमा मछिन्द्र गण्डकी प्रदेशसँग १–० ले स्तब्ध बनेको हो । 
गण्डकीको जितमा खेलको २५ औं मिनेटमा मुकुन्द निउरेले विजयी गोल गरे । 

दोस्रो हाफको २२ औं मिनेटमा मछिन्द्रले खेलमा अग्रता लिने अवसर गुमाएको थियो । बिमल घर्तिमगरले पेनाल्टीमा गोल गर्न सकेनन् । उनको प्रहार गोलकिपर आकाश रानाभाटले रोकेका थिए ।

आकाश खेलको म्यान अफ दी म्याच घोषित भए । शनिबार अन्तिम क्वार्टरफाइनलमा संकटा र २८ विगाहाबीच प्रतिस्पर्धा हुनेछ ।

राईनो क्लब मध्यबिन्दु नवलपुरको आयोजनामा सञ्चालित प्रतियोगितामा १२ टिम सहभागी छन् । प्रतियोगिताको विजेताले उपाधिसहित नगद ८ लाख हात पार्नेछ भने उपविजेताले ४ लाख प्राप्त गर्नेछ ।

प्रतियोगिताको सर्वोत्कृष्ट खेलाडीले २० हजार रुपैयाँ प्राप्त गर्ने तथा सर्वाधिक गोलकर्ताले १० हजार र म्यान अफ द म्याच हरेक खेलमा ५ हजार रुपैयाँ प्राप्त गर्नेछन् ।