काठमाडौं । पारस खड्कालाई मैदान फर्काएर नीजि क्षेत्रबाट निर्मित नेपालको पहिलो क्रिकेट रंगशाला एक्स्ट्राटेक ओभल क्रिकेट मैदानको उद्घाटन हुने भएको छ ।
रुपेन्देहीको तिलोत्तमामा फागुन १४ गते एक्स्ट्राटेक ओभर क्रिकेट मैदानको उद्घाटनमा आयोजित मैत्रीपूर्ण क्रिकेट खेलमा पारस मैदान फर्कने भएका हुन् ।
क्यानको ब्यवस्थापनमा आउन क्रिकेटबाट हठात सन्यास लिएका पारसलाई समर्थकले मैदान देख्ने चाहना राख्दै आएका थिए । नीजि क्षेत्रको लगानीमा रुपन्देहीमा निर्मित क्रिकेट मैदानको उद्घाटनका लागि चार टिमलाई मैदान उतार्ने तयारी गरिएको छ ।
नेपालको पहिलो अन्तराष्ट्रिय खेल खेलेको १९९६ को टोली, रुपन्देही लिजेन्ड्स, सन् २०१४ को टी ट्वान्टी विश्वकप खेलेको टोली र रेस्ट अफ नेपाल गरि ४ टोलीलाई १० ओभरको म्याचमा खेलाउने आयोजकको तयारी छ । पारसले सन् २०१४ को विश्वकप खेलेको टोलीको नेतृत्व गर्नेछन् ।
‘सन्यासपछि कहिले क्रिकेट खेल्छु भन्ने प्रश्न सबैको हुन्थ्यो । एक्स्ट्राटेकको उद्घाटनमा त्यो अवसर जुरेको छ ।’ पारसले काठमाडौंमा शुक्रबार आयोजित पत्रकार सम्मेलनमा भने, ‘त्यो भन्दा ठुलो नयाँ मैदान नेपाली क्रिकेटले पाएको छ ।’
अष्ट्रेलियामा रहदै आएका बिनोद कुँवरले नीजि लगानीमा रुपन्देहीमा अन्तराष्ट्रिय स्तरको क्रिकेट रंगशालाको निर्माण गरेका छन् । गत वर्षमात्र उद्घाटन गरेर निर्माण थालिएको रंगशाला फागुनमा उद्घाटन गर्ने घोषणा गरिएको छ ।
