महासचिव राईविरुद्ध ठगी र किर्तेको आरोपमा उजुरी दर्ता

काठमाडौं । अखिल नेपाल फुटबल संघ (एन्फा) महासचिव किरण राईविरुद्ध ठगी र किर्ते गरेको आरोपमा उजुरी दर्ता भएको छ । 

एन्फा कार्यसमिती सदस्य अनिल मल्लले महासचिव राईले किर्ते गरेको र ठगी गरेको भन्दै एन्फाको पुनरावेदन समितिमा उजुरी दर्ता गराएका हुन् । 

मल्लले इमेल मार्फत समितिमा उजुरी दर्ता गराएका हुन् । 

‘एन्फाको कार्तिक २३ गते हेटौंडा भएको विशेष साधारण सभाको  खर्चको विषयमा कार्य समितीको बैठकको एजेन्डा नभएको उक्त विषय लुकाउन खोजिएको । खर्चको फाटवारि पेश नगरि, छलफल नगरि, निर्णय पुस्तिकामा, हेटौंडा विशेष साधारण सभाको लागत खर्च अनुमोदन गरियो भनी, बैठकको माइन्युटमा लेखिएको विषय ज्यादै संबेदनसिल र गम्भीर समेत रहेको छ,’ उजुरीमा लेखिएको छ । 

नेपाली फुटबल र एन्फाका लागि मात्रै नभई सम्पुर्ण नेपाली खेल क्षेत्रकै लागि अवैधानिक र लज्जास्पद विषय भएको हुँदा यो विषय कार्यसमिति लगायत सम्पुर्ण सरोकार वालाका लागि किर्ते ठगीको विषय भएको भन्दै छानविन गर्न उजुरीमा माग गरिएको छ ।