काठमाडौं । प्रधानमन्त्री कप राष्ट्रिय एकदिवसीय क्रिकेटमा बागमती प्रदेशले कोशी प्रदशेमाथि सहज जित निकालेको छ ।
शुक्रबार भएको खेलमा बागमतीले कोशीलाई ६४ रनले हराएको हो । त्रिवि क्रिकेट मैदानमा बागमतीले दिएको २७४ रनको लक्ष्य पछ्याएको कोशीले ४७ ओभर १ बलमा सम्पूर्ण विकेट गुमाउँदै २०९ रन बनायो ।
कोशीका लागि अंकित यादव र सुजन थपलियाले अर्धशतकीय पारी खेले । ६५ बल खेलेका अंकितले ४ चौका र २ छक्काको सहयोगमा ५३ रन बनाए ।
त्यस्तै ७६ बल खेलेका सुजनले ४ चौका र ३ छक्काको सहयोगमा ५९ रन बनाए । कोशीका आइस भट्राइले ३२ रन बनाए ।
बलिङतर्फ बागमतीका लागि इशान पाण्डेले सर्वाधिक पाँच विकेट लिए । ८ ओभर बलिङ गरेका उनले ३९ रन खर्चे ।
बागमतीका सूर्य तामाङले दुई विकेट लिँदा रिजन ढकाल र प्रकित श्रेष्ठले एक–एक विकेट लिए ।
त्यसअघि पहिले ब्याटिङ गरेको बागमतीले ४८ ओभर ३ बलमा सम्पूर्ण विकेट गुमाउँदै २७३ रन बनायो ।
बागमतीका लागि आशुतोष घिरैयाले ११८ रनको शतकीय पारी खेले । उनले १११ बल खेल्दै १६ चौका र २ क्का प्रहार गरे ।
बागमतीका लागि कप्तान रित गौतमले ४९ रन बनाउँदा रविन जोशीले ४३ रनको योगदान गरे । त्यस्तै प्रतिक श्रेष्ठले १९ रन बनाए ।
कोशीका लागि आभेस तिमल्सेनाले तीन विकेट लिँदा कमल खत्री र हेमन्त राईले दुई–दुई विकेट लिए ।
