काठमाडौं । भारतले अफगानिस्तानविरुद्धको तीन म्याचको टी ट्वान्टी सिरिज क्लिन स्विप गरेको छ ।
अन्तिम खेलमा दोस्रो सुपर ओभरमा अफगानिस्तानलाई हराउँदै भारतले सिरिज क्लिन स्विप गरेको हो ।
सिरिजको तेस्रो खेलको नतिजा निकैनै रोमाञ्चक रह्यो । खेलको निर्णय दोस्रो सुपर ओभरबाट मात्र निस्किएको थियो ।
सुरुवाती दुई खेल जित्दै भारतले सिरिज यसअघिनै आफ्नो पक्षमा पारिसकेको थियो ।
चिन्नास्वामी स्टेडियममा पहिले ब्याटिङ गरेको भारतको सुरुवात खराब रह्यो । उसले २२ रन बनाउन महत्वपुर्ण ४ विकेट गुमाएको थियो । त्यसपछि भारतीय कप्तान रोहित शर्माले टी ट्वान्टीमा अन्तराष्ट्रिय पाँचौं शतक प्रहार गर्दै भारतका लागि शानदार इनिङ्स खेले । रिङ्कु सिंहले समेत अर्धशतक प्रहार गरेपछि भारतले ४ विकेटको क्षतीमा २ सय १२ रनको शानदार रन बनाएको थियो । तर अफगानिस्तानले समेत उस्तै चुनौती भारतसमक्ष पस्कियो।
रहमनुल्लाह गुरबाज र इब्राहिम जादरानको अर्धशतकमा अफगानिस्ताले ६ विकेट गुमाएर २ सय १२ रननै बनायो ।
सुपर ओभरमा अफगानिस्तान टिमले पहिले ब्याटिङ गर्दै १६ रन बनाएको थियो । गुलबदीन नायब र मोहम्मद नबीले अफगानिस्तानका लागि ब्याटिङ गरेका थिए भने भारतका लागि तिव्र गतिका बलर मुकेश कुमारले बलिङ गरेका थिए ।
त्यसपछि अफगानिस्तानका अजमतुल्लाह अमरजईविरुद्ध रोहित शर्मा र यशस्वी जयसवालले १६ रन प्रहार गरे । त्यसपछि सुपर ओभरको खेल समेत बराबरीमा सकिएको थियो ।
दोस्रो सुपर ओभरमा भारतले ५ बलमा ११ रन बनाएको थियो ।
भारतका लागि स्पिनर रवि बिश्रोईले मोहम्मद नबी र रहमनुल्लाह गुरबाजलाई आउट गर्दै अफगानिस्तानलाई ३ बलमा १ रनमा समेटेपछि भारतको जित सम्भव भएको हो । तर अन्तिम बलसम्म अफगानिस्तानले भारतलाई कडा टक्कर दिएको थियो ।
टी ट्वान्टी विश्वकप अघि भारतको योनै अन्तिम अन्तराष्ट्रिय टी ट्वान्टी सिरिज हो ।
