विनोदको शतकमा आर्मीको विजयी सुरुवात 

काठमाडौं । विनोद भण्डारीको शतकको सहयोगमा त्रिभुवन आर्मी क्लबलले प्रधानमन्त्री कप एकदिवसीय राष्ट्रिय क्रिकेट प्रतियोगितामा विजयी सुरुवात गरेको छ । 

सोमबार भएको खेलमा आर्मीले मधेश प्रदेशमाथि १२६ रनको हसज जित हात पारेको हो । 

त्रिवि क्रिकेट मैदानमा आर्मीले दिएको ३२१ रनको लक्ष्य पछ्याएको मधेशले ४८ ओभर ४ बलमा सम्पूर्ण विकेट गुमाउँदै १९४ रन बनायो । 

मधेशका लागि पवन सरार्फले ६५ रनको अर्धशतकीय पारी खेले । ८३ बल खेलेका उनले ७ चौका र ३ छक्का प्रहार गरे । 
त्यस्ते मयान यादवले ३४ रन बनाउँदा राजेश यादवले ३२ रनको योगदान गरे । आर्मीका लागि साहव आलमले चार विकेट लिए । त्यस्तै सोमपाल कामीले दुई विकेट लिँदा जितेन्द्र मुखिया र कुशल मल्लले एक–एक विकेट हात पारे । 

यसअघि पहिले ब्याटिङ गरेको आर्मीले निर्धारित ५० ओभरमा सम्पूर्ण विकेट गुमाउँदै ३२० रन बनायो । आर्मीका लागि विनोद भण्डारीले ११३ रनको शतकीय पारी खेले । ९३ बल खेलेका उनले ९ चौका र ६ छक्का प्रहार गरे । 

त्यस्तै सन्तोश कार्कीले ४२ रन बनाउँदा बिवेक यादव र कुशल मल्लले समान ३७–३७ रनको योगदान गरे । 

मधेशका लागि रन्जित कुमारले सर्वाधिक पाँच विकेट लिए । उनले ९ ओभर बलिङ गरेर ४१ रन खर्चे । त्यस्तै विशाल पटेलले दुई विकेट लिए । 

आजनै भएको अर्काे खेलमा लुम्बिनी प्रदेशलाई सुदूरपश्चिम प्रदेशले ५ विकेटले हराएको छ । लुम्बिनीले दिएको १५८ रनको लक्ष्य सुदूरपश्चिमले २९ ओभर ३ बलमा पाँच विकेट गुमाएर लक्ष्य पूरा गर्यो ।