निजगढ । मधेस प्रदेश स्तरीय प्रधानमन्त्री कप एकदिवसीय क्रिकेट छनोट प्रतियोगिताको उपाधिका लागि बारा र पर्सा भिड्ने भएका छन् ।
मंगलबार सम्पन्न सेमिफाइनल खेलमा बारा र पर्सा बिजयी भएसँगै फाइनल पुग्ने जिल्लाको टुंगो लागेको हो ।
कलैयाको सिद्धेश्वर क्रिकेट मैदानमा सम्पन्न खेलमा बाराले धनुषालाई १० रनले पराजित गर्यो ।
खराब मौसमका कारण २४ ओभरमा घटाएर खेलिएको खेलमा टस हारेर पहिले ब्याटिङ गरेको बाराले निर्धारित ओभरमा ९ विकेट गुमाउँदै १२४ रन बनायो ।
बाराका लागि अरनिको यादवले ४० बलमा ३८ रन बनाए भने साहिल पटेलले ४१ बलमा ३३ रन बनाए ।
धनुषाका लागी बिक्रान्त कुमार यादवले २९ रन खर्चिएर ४ विकेट लिए ।
१२५ रनको लक्ष्य सहित जवाफी ब्याटिङमा उत्रिएको धनुषाले निर्धारित ओभरमा ९ विकेट गुमाउँदै ११४ रन मात्र बनाउन सक्यो ।
धनुषाका हरि शंकर साहले ३३ बलमा ३४ रन बनाए । मयङ्क यादवले २९ रन बनाए ।
बाराका कप्तान अनिल कुमार साहले १८ रन मात्र खर्चिएर ४ विकेट हात पारे ।
बाराका अरनिको यादव खेलको प्लेयर अफ दी म्याच बने ।
अर्को सेमिफाइनलमा पर्साले सिरहालाई २ विकेटले हरायो ।
पहिले ब्याटिङ गरेको सिरहाले २१ दशमलव २ ओभरमा अलआउट हुँदै १ सय ६ रन मात्र बनाउन सक्यो । सिरहाका कृष्ण साहले ४७ बलमा २९ रन बनाए ।
पर्साका साम्सद मंसुरीले १९ रन मात्र खर्चंदै ३ विकेट हात पारे ।
१ सय ७ रनको लक्ष्य पछ्याएको पर्साले २२ दशमलव १ ओभरमा ८ विकेट गुमाउँदै लक्ष्य पूरा गर्यो । पर्साका सफवान अन्सारीले ३२ बलमा २९ रन बनाए ।
सिरहाका प्रदिप पासवानले १३ रन मात्र खर्चिएर ३ विकेट लिएपनि सिरहालाई हारबाट जोगाउन सकेनन् ।
खेलको प्लेयर अफ द म्याच पर्साका साम्सद मंसुरी बने ।
प्रतियोगिताको उपाधिका लागि शनिबार बारा र पर्साबीच भिडन्त हुनेछ ।
प्रधानमन्त्री कप एकदिवसीय राष्ट्रिय क्रिकेट प्रतियोगिताका लागि मधेस प्रदेश छनोटमा ८ वटा जिल्लाले सहभागिता जनाएका थिए ।
