एपीएफलाई पीएम कप महिला क्रिकेटको उपाधि

काठमाडौं । विभागीय टोली एपीएफ क्लबले प्रधानमन्त्री कप महिला राष्ट्रिय टी–ट्वान्टी क्रिकेट प्रतियोगिताको उपाधि जितेको छ । 
बुधबार भएको फाइनल खेलमा कोशी प्रदेशलाई ११ रनले हराउँदै एपीएफले उपाधि जितेको हो । त्रिवि क्रिकेट मैदानमा एपीएफले दिएको ११५ रनको लक्ष्य पछ्याएको कोशीले निर्धारित २० ओभरमा ४ विकेट गुमाउँदै १०३ रन बनायो ।

कोशीका लागि रुविना क्षेत्रीले रनको अर्धशतकीइ पारी खेलिन् । ५८ बल खेलेकी उनले ७ चौका र १ छक्का प्रहार गरिन् । त्यस्तै लागि काजल श्रेष्ठले २२ रन बनाउँदा अप्सरी बेगमले ८ रनको योगदान गरिन् । 

बलिङतर्फ एपीएफका लागि सीता राना मगर र करुणा भण्डारीले एक–एक विकेट लिइन् । यसअघि टस जितेर पहिले ब्याटिङ गरेको एपीएफले निर्धारित २० ओभरमा ७ विकेट गुमाउँदै ११४ रन बनाएको थियो ।  

एपीएफका लागि इन्दुले ५३ रनको अर्धशतकीय पारी खेलिन् । ४७ बल खेलेकी उनले ६ चौका र १ छक्का प्रहार गरिन् । एपएिफका लागि ज्वती पाण्डेले २७ रन बनाउँदा रोमा थापा १४ तथा सरिता मगरले ९ रनको योगदान गरिन् । 

बलिङतर्फ कोशीका लागि अप्सरी बेगमले ह्याट्रिक विकेट लिइन् । उनले अन्तिम ओभरमा तीन विकेट लिइन् । त्यस्तै अलिशा खाडियाले दुई विकेट लिँदा रुविना क्षेत्री र निशा शाहले एकएक विकेट लिइन् ।