आर्मीलाई हराउँदै सन्दीपको टिम फाइनलमा

काठमाडौं । नेपाली राष्ट्रिय टोलीका खेलाडी सन्दीप लामिछानेको टोली पर्सा क्लब ११ नेपाल प्रो क्लब च्याम्पियनसिपको फाइनलमा प्रवेश गरेको छ ।

विभागीय टोली त्रिभुवन आर्मी क्लबलाई ३१ रनले हराउँदै पर्सा क्लब ११ नेपाल फाइनल पुगको हो । वीरगंजस्थित नारायणी क्रिकेट मैदानमा पर्साले दिएको १०० रनको लक्ष्य पछ्याएको आर्मीले १६ ओभर २ बलमा सम्पूर्ण विकेट गुमाउँदै मात्र ६८ रन बनायो । 

प्रतियोगितामा आर्मीको यो पहिलो हार हो । आर्मीका लागि कुशल मल्लले १९ र बसिर अहमदले अविजित १० रन बनाउनु बाहेक अन्य ब्याटरले दोहोरो अंकमा रन जोड्न सकेनन् ।

बलिङतर्फ पर्साका लागि कप्तान सन्दीप लामिछानेले तीन विकेट हात पारे । त्यस्तै अनिल शाह, पवन सराफ र साम्सद मन्सुरीले समान दुई–दुई विकेट लिँदा रन्जित कुमारले एक विकेट लिए ।

त्यसअघि टस हारेर ब्याटिङ गरेको पर्साले १९ ओभर ४ बलमा सबै विकेट गुमाउँदै ९९ रनको बनाएको थियो । पर्साका लागि सम्सद मन्सुरीले १७ रन बनाउँदा अनिल शाह १५, रुपेश सिंह १५ र पवन सराफले ११ रन बनाए ।

आर्मीका लागि सोमपाल कामीले सर्वाधिक चार विकेट लिए । त्यस्तै कुशल मल्लले तीन विकेट लिँदा शाहब आलमले दुई र विवेक यादवले एक विकेट लिए ।

आजनै भएको अर्काे दोस्रो सेमिफाइनल खेलमा वोन्डर्स क्लब नोयडामाथि ४ रनको जित हात पार्दै फाइनलमा पुगेको छ ।

पुलिसले जितका लागि दिएको ११३ रनको लक्ष्य पछ्याएको नोयडाले २० ओभरमा ९ विकेट गुमाउँदै मात्र १०८ रन बनायो । 

पर्साले उपाधिका लागि नेपाल पुलिस क्लबसँग प्रतिस्पर्धा गर्नेछ ।