काठमाडौं । पीएम कप राष्ट्रिय महिला क्रिकेट प्रतियोगितामा विभागीय टिम एपीएफ र कोशी प्रदेशले लगातार तेस्रो जित दर्ता गराएका छन् ।
आईतबार मुलपानी मैदानमा एपीएफले तेस्रो जित निकाल्ने क्रममा लुम्बिनी प्रदेशलाई ९० रनले हरायो ।
सुरुवाती ब्याटिङ गरेको एपीएफले निर्धारित ओभरमा ३ विकेट गुमाएर १ सय ५१ रन बनाएको थियो । एपीएफका लागि इन्दु वर्माले अविजित ७० रनको इनिङ्स खेलेकी थिईन् । उनले ५१ बलमा ७ चौका र १ छक्काको मदतले सो रन बनाईन् । ओपनर ममता चौधरीले ५९ रनको योगदान दिईन् । कप्तान सिता राना मगर ९ रनमा आउट भएकी थिईन् । लुम्बिनीका सरस्वती पुन र सर्मिला रोकाले समान एक एक विकेट लिए ।
एपीएफले प्रस्तुत गरेको १ सय ५२ रनको लक्ष्य सहित मैदान छिरेको लुम्बिनीले ९ विकेट गुमाएर ६१ रन मात्र बनाउन सक्यो । ओपनर लक्ष्मी चौधरीले २८ रन बनाउनु बाहेक अन्य कुनै खेलाडीले दोहोरो अंकको स्कोर बनाउन सकेनन् । एपीएफकी इन्दु वर्माले ३ ओभरमा २ मेडन राख्दै ७ रन खर्चिएर ३ विकेट झारिन् । बिनु बुढाले २ तथा रेखा रावल र सिता राना मगरले एक एक विकेट लिए ।
एपीएफ लगातार तेस्रो खेलमा जित निकाल्दै लिग तालिकाको शीर्ष स्थानमा रहेको छ ।
कीर्तिपुर मैदानमा भएको दिनको पहिलो खेलमा कोशी प्रदेशले मधेश प्रदेशलाई ६० रनले हरायो । सुरुवातमा ब्याटिङ गरेको कोशीले निर्धारित ओभरमा ४ विकेट गुमाएर १ सय २९ रन बनाएको थियो । कप्तान रुबिना क्षेत्रीले ५७ रन बनाएको इनिङ्समा अपसरी बेगमले ३९ रनको योगदान गरिन् । सबनम राई १६ रनमा अविजित रहिन् ।
मधेशी मिना महतोले २ तथा पुजा महतो र सरस्वती कुमारीले समान एक एक विकेट लिए ।
१ सय ३० रनको लक्ष्य सहित मैदान आएको मधेशले ९ विकेट गुमाएर ६९ रन मात्र बनाउन सक्यो । साना प्रविनले अविजित २७ रन र आरती महतोले २८ रन बनाउनु बाहेक अन्यले दोहोरो अंकको स्कोर छुन सकेनन् । सबनम राई र अलिशा खडियाले समान २ तथा संगिता राई र रुबिना क्षेत्रीले समान एक विकेट झारेका थिए ।
कोशी समेत लगातार तेस्रो खेलमा जित निकाल्दै ६ अंक जोडेको छ । एपीएफसँग समान अंक भएपनि रनरेटका आधारमा कोशी लिगको दोस्रो स्थानमा छ ।
