सत्यवती एकेडमीलाई एलपीएलको उपाधि
धनगढी । आठौँ संस्करणको लिटल फ्लावर प्रिमियर लिग एलपीएलको उपाधि सत्यवती एकेडेमी अत्तरियाले जितेको छ।
कैलालीको धनगढीस्थित फाप्ला क्रिकेट मैदानमा सम्पन्न फाइनलमा सत्यवती एकेडेमीले धनगढी स्पोर्ट्स क्लबलाई ५ रनले पराजित गर्यो।
रोमान्चक खेलमा सत्यवतीले दिएको १ सय २७ रनको लक्ष्य पछ्याएको धनगढी स्पोर्ट्सले १९ दशमलव २ ओभरमा सबै विकेट गुमाएर १ सय २१ रन मात्र बनाउन सक्यो ।
धनगढी स्पोर्ट्सका लागि बसन्त कार्कीले ३५, सुनिल धमलाले २८ तथा अमर सिंह रौटेलाले २७ रन योगदान दिए ।
धनगढी स्पोर्ट्सले ३६ रनमा सुरुवात ५ विकेट गुमाएको थियो। छैठौं विकेटको लागि बसन्त कार्की र भुवन कार्कीले ३३ रनको साझेदारी गरेका थिए। भुवनको विकेट पछि सातौँ विकेटको लागि बसन्तले अमर सिंह रौटेलासंग ४३ रन जोडे।
अठारौं ओभरमा अभिषेक कोइरालाले अमर सिंह रौटेलाको विकेट लिंदै सत्यवतीलाई खेलमा फर्काए। लगत्तै ओभरमा तृत राज दासले बसन्त कार्की र दिपक चन्दको विकेट लिएका थिए।
जितको लागि अन्तिम ओभरमा १० रन चाहिदा धनगढी स्पोर्ट्स क्लबसंग १ विकेट बाँकी रहेको थियो। अन्तिम ओभर बलिङ्ग गरेका सन्दिप खत्रीले पहिलो बलमा वाइड र दोश्रो बलमा २ रन दिएपछि तेश्रो बलमा विकास आग्रीको रुपमा धनगढी स्पोर्ट्सले अन्तिम विकेट गुमायो।
सत्यवतीका लागि अभिषेक कोइरालाले सर्वाधिक ४ विकेट लिए । तृत राज दासले २ तथा फिर्दोश अन्सारी, सन्तोष कार्की र रञ्जित कुमारले १-१ विकेट लिए।
यसअघि टस जितेर ब्याटिङ्ग गरेको सत्यवती एकेडेमीले २० ओभरमा ६ विकेट क्षतीमा १ सय २६ रन बनाएको थियो।
सत्यवतीका सन्दिप रजालीले सर्वाधिक ४१ रन बनाए । उनले ३६ बलमा ३ चौका र ३ छक्का प्रहार गरेका थिए। तृत राज दासले १३ बलमा अविजित २७ रन बनाए । फिर्दोश अन्सारीले २२, सन्तोष कार्की र समिर कार्कीले समान १० रन बनाए।
पावरप्लेमा ३ विकेट गुमाएको अवस्थाबाट चौथो विकेटको लागि सन्दिप रजाली र फिर्दोश अन्सारीले ६७ रनको साझेदारी गर्दै टिमलाई उकासेका थिए। आठौँ विकेटको लागि तृत राज र समिर कार्कीले अविजित ३६ रनको साझेदारी गरे।
धनगढीका दिपक चन्द, भोज राज भट्ट र भुवन कार्कीले २-२ विकेट लिए।
विजेता सत्यवती एकेडेमीले विजेता ट्रफी सहित दुई लाख ५५ हजार र उपविजेता धनगढी स्पोर्ट्स क्लबले एक लाख २८ हजार रुपैयाँ पुरस्कार पाएका छन्।
प्रतियोगिताको उत्कृष्ट खेलाडी तथा उत्कृष्ट बलर धनगढी स्पोर्ट्स क्लबका कप्तान समेत रहेका भुवन कार्की घोषित भए। प्रतियोगिताका उत्कृष्ट ब्याट्सम्यान शुक्लाफांटा ब्ल्याकबक्सका किरण ठगुन्ना घोषित भए । उदयमान खेलाडी कैलाली जिल्ला क्रिकेट क्लबका सुधांशु रावल घोषित भए।
विजेता खेलाडीहरुलाई समापन कार्यक्रमका प्रमुख अतिथि सुदूरपश्चिम प्रदेशका सामाजिक विकास मन्त्रि झपट बहादुर साउदले पुरस्कृत गरेका थिए ।
