एनएसएल – धनगढीसँग बुटवलको भिडन्त

काठमाडौं । नेपाल सुपर लिग एनएसएलमा आज बिहीबार धनगढी एफसी र बुटवल लुम्बिनी भिड्दैछन् ।

प्रतियोगिताको आफ्नो दोस्रो खेलमा दुवै टिम भिड्न लागेका हुन् । 

त्रिपुरेश्वरस्थित दशरथ रंगशालामा हुने खेल साँझ साढे ५ बजे सुरु हुनेछ ।

पहिलो खेलमा धनगढीले विरगञ्ज युनाईटेड एफसी २–१ ले हराएको थियो । बुटवल भने ललितपुर सिटी एफसीसँग २–० ले पराजित बनेको थियो ।

धनगढी प्रतियोगिताको साविक उपविजेता हो । पहिलो खेलमा गोल गरेका फोडे फोफाना र अहमेद हिजाजी धनगढीमा प्रभाव छाड्न सक्ने खेलाडी हुन् ।

पहिलो गोलका लागि बल उपलब्ध गराउने ओलावले अफिजले कुनैपनि समय प्रतिद्धन्दी टिमलाई समस्यामा पार्न सक्छन् । आशिष चौधरी मार्की खेलाडी रहेको धनगढीसँग घरेलु फुटबलका परिचित अनुहार टिममा छन् । 

अर्कोतिर बुटवलको मिडफिल्ड पहिलो खेलमा चल्नै सकेन । एरिक विष्ट, मणी लामा, प्रकाश बुढाथोकी जस्ता राष्ट्रिय टिमका अनुभवी मिडफिल्डरले पहिलो खेलमा राम्रो प्रभाव देखाउन सकेनन् ।

घरेलु लिगको चर्चित नाम स्टेफन समिर वियोङ र इर्नेस्ट टेम्पेबाट बुटवलले ठुलो अपेक्षा गरेको छ । यि दुई विदेशी खेलाडीले कुनैपनि समय धनगढीलाई समस्यामा पार्न सक्छन् ।

बुटवल प्रतियोगितामा पहिलो जितको खोजीमा छ । धनगढी लगातार दोस्रो जित निकाल्ने लक्ष्यमा रहेको छ ।