कोटेश्वर डोजाङलाई २० लाखको खेल सामाग्री सहयोग

काठमाडौं । दक्षिण एसियाली खेलकुद (साग)का स्वर्णधारी दाजुभाइ निर्मल र निराजन श्रेष्ठको पहलमा कोटेश्वर तेक्वान्दो डोजाङलाई खेल सामाग्री प्रदान गरिएको छ ।

श्रेष्ठ दाजुभाइले डोजाङका प्रमुख एवं तेक्वान्दोका मुख्य प्रशिक्षक नवीनकुमार श्रेष्ठलाई २० लाख रुपैयाँ बराबरको २ सेट प्रोटेक्टर इलेक्ट्रोनिक सिस्टम एक कार्यक्रमबीच हस्तान्तरण गरेका छन्।

सो अवसरमा डोजाङका प्रशिक्षक, खेलाडी, तेक्वान्दोको ग्योरोगी, पुम्से र पारा अन्तर्राष्ट्रिय निर्णायक एवं नेप्लिज तेक्वान्दो एकेडेमीका अध्यक्ष अशोक खड्कालगायतको उपस्थिति रहेको थियो ।

सहयोग सामाग्री खरिद गर्न दाजुभाइसहित अस्ट्रेलिया बस्ने सक्षम कार्की, रञ्जन श्रेष्ठ, मनोज मल्ल, ज्ञानेन्द्र मल्ल र भुपेन श्रेष्ठ तथा मकाउ बस्ने राकेश केसीले सहयोग गरेका हुन् । सबै तेक्वान्दो खेलाडी हुन् ।

मुख्य प्रशिक्षक श्रेष्ठका अनुसार सहयोगी सबै कोटेश्वर तेक्वान्दो डोजाङका उत्पादन हुन् ।

निर्मल र निराजनले पाकिस्तानमा भएको नवौं दक्षिण एसियाली खेलकुदमा स्वर्ण जितेका थिए । दुवै विगत १८ वर्षदेखि ओमेरिकाको ओरेगनमा बस्दै आएका छन् । त्यहाँ पनि उनीहरुले वान तेक्वान्दो एकेडेमी चलाउनुका साथै मुख्य गरी व्यवसायमा संलग्न छन् । उनीहरु सेभेन ११ र मार्ट सञ्चालन गर्छन् ।

दुवैले संगै एसियाली खेलकुद बुसान एसियाड पनि खेलेका थिए । निराजनसंग विश्व तेक्वान्दो च्याम्पियनसिप खेलेको अनुभव पनि छ । परिवारसहित चार्ड पर्वका लागि नेपाल आएका दुवै बिहीबारै अमेरिका फर्केका छन् ।

कार्यक्रममा निराजनले नेपालकै चर्चित मध्येको एक र राष्ट्रलाई थुप्रै अन्तर्राष्ट्रिय पदक दिलाएका खेलाडी उत्पादनमा महत्वपूर्ण भूमिका निर्वाह गर्दै आइरहेको कोटेश्वर तेक्वान्दो डोजाङलाई सहयोग गर्न पाउँदा खुशी लागेको बताउदै खेलाडीको समस्यामा हरदम साथ रहने प्रतिबद्धता जनाए ।

निराजनले खेल जीवनमा उतार चढाव आइरहने बताउँदै खेलाडीले कुनै एउटा अवसर गुमाउँदैमा निराश हुन नहुने बताउँदै निरन्तरतानै सफलताको कडी भएको बताए । उनले ओलम्पिकमा पदक जित्ने आफ्नो चाहना पूरा नभएपनि कुनै दिन कोटेश्वर तेक्वान्दो डोजाङका खेलाडीले आफ्नो अधुरो चाहना पूरा गर्नेमा आफू आशावादी रहेको बताए ।

मुख्य प्रशिक्षक श्रेष्ठले सहयोगका लागि सबैलाई धन्यवाद दिदै यस्ता सहयोगले डोजाङकर्मीको हौसला अभिबृद्धि गर्ने बताएका छन् ।