हान्जाउ पुगे कराँते खेलाडी, पदकको छ आश

काठमाडौं । एसियन गेम्सको १९ औं संस्करणमा सहभागीता जनाउने नेपालको कराँते टिम चीनको हान्जाउ पुगेको छ । एसियाडका लागि इन्डोनेसियाको तयारीपछि नेपाली कराँते टिम होन्जाउ पुगेको हो ।

मार्सल आर्टका अन्य खेलमा निराशाजनक प्रर्दशन र नतिजापछि सबैको पदकको आश कराँते खेलमा देखिन्छ ।

एसियन गेम्सको अन्तिम सप्ताह तिर पुग्नै लाग्दा नेपालले कबड्डीको महिला टिम इभेन्ट्समा मात्र पदक जित्ने देखिएको छ । मार्सल आर्ट सहित अन्य खेलमा नेपालको प्रर्दशन र नतिजा निराशाजनक रहेको छ । 

कराँतेबाट ८ खेलाडीले एसियन गेम्समा नेपालको चुनौती पेश गर्नेछन् । सन्तोष श्रेष्ठले ६७ केजी मुनिको तौल समूह, मोहम्मद शेख आलमले ७५ केजी मुनिको तौल समूह, बिप्लव लाल श्रेष्ठले ८४ केजी माथिको तौल समूह र स्वर्णिम मानन्धरले एकल कातामा नेपालको चुनौती पेश गर्नेछन् ।

यस्तै, सबिना क्षेष्ठले ५० केजी मुनिको तौल समूह, निरुपा तामाङ्गले ६१ केजी मुनिको तौल समूह, एरिका गुरुङ्गले ६८ केजीमाथिको तौल समूह र एलिसा रास्कोटी मगरले एकल कातामा नेपालका लागि खेल्नेछन् ।

नेपाल कराँते महासंघले भने काता भन्दापनि कुमुते (फाइट) स्पर्धामा नेपालको पदकको सम्भावना देखेको छ । इन्डोनेसियामा भएको डब्लुएसकेएफ वल्ड च्याम्पियनसिपमा नेपाली खेलाडीको प्रर्दशन र प्राप्त गरेको पदकका आधारमा समेत एसियाडमा कराँतेले पदकको आश गरेको हो ।

कुनैसमय अन्तराष्ट्रिय स्तरमा राम्रो नतिजा र प्रर्दशन गरिरहेको कराँते पछिल्लो समय निरन्तर ओरालो झर्दै आएको थियो । कराँते महासंघमा नयाँ नेतृत्वको आगमनसँगै कराँते पुरानै लय र गतिमा फर्कने विश्वास खेलकुदकर्मीले लिएका छन् । 

कराँतेको स्पर्धा आगामी मंगलबारदेखि शुक्रबारसम्म सञ्चालन हुनेछ ।