'एक महिनामा कुनै पनि खेलाडी कोहली या बाबर बन्न सक्दैन ' - रोहित

काठमाडौं । नेपाली राष्ट्रिय क्रिकेट टोलीका कप्तान रोहित पौडेलले कुनै पनि खेलाडी एकै महिनामा विराट कोहली र बाबर आजम बन्न नसक्ने बताएका छन् ।

एसीसी इमर्जिङ टिम्स एसिया कप तथा एसिया कपको दुई साता तयारी गरेर श्रीलंकाबाट बिहीबार स्वदेश फर्किएपछि रोहितले उक्त प्रतिक्रिया दिएका हुन् ।

'एक महिनामा केहि पनि परिवर्तन हुँदैन । एक महिनामा कोही पनि विराट कोहली र बाबर आजम बन्दैन । त्यसको लागि विस्तारै समय लाग्छ । भनिन्छ नि जित्दा खेरी आतिनु हुँदैन र हार्दा मातिनु हुँदैन । यति बेला सबैले धैर्यता राख्न सक्नुपर्छ’, रोहितले भने ।

टेस्ट र एसोसिएट टोलीको स्तरको फरक बारे बताउदै रोहितले थपे  ‘एसोसिएट टोली र टेस्ट टोलीमा फरक भईहाल्छ । त्यो हामीले बुझ्नुपर्ने कुरा हो । एसोसिएटमा खेल्दा सबै जित्छौं भने यो होईन की टेस्टमा राष्ट्रसँग पनि सबै खेल जित्छौं । विशेषतः अफगानिस्तानलाई हेरे हुन्छ । उनीहरुले पनि सुरु सुरुमा विस्तारै सुधार गर्दै गएका थिए ।'

इमर्जिङ कपमा नेपाल भारत ए सँग ९ विकेट र पाकिस्तान ए सँग ४ विकेटले पराजित भएको थियो । युएई ए लाई ३ विकेटले हराएको नेपाली क्रिकेट टोली बिहीबार दिउँसो नेपाल आएको थियो । 

नेपालले अगष्ट ३० देखी १७ सेप्टेम्बर सम्म पाकिस्तान र श्रीलंकामा हुने एसिया कप खेल्नेछ । नेपाल समूह ए मा भारत र पाकिस्तानसँगै छ । नेपालले अगष्ट ३० मा पाकिस्तान र सेप्टेम्बर ४ मा भारतसँग खेल्नेछ ।