भक्तपुरमा बुद्धिचाल हुने

भक्तपुर । भक्तपुर युवा टिम भक्तपुर ७ गोल्मढीको आयोजनामा स्वर्गीय त्रिरत्न ग्वाछा स्मृति खुला रापिड बुद्धिचाल प्रतियोगिता हुने भएको छ ।

प्रतियोगिता जेठ १२ र १३ गते भक्तपुरको गोल्मढीस्थित झौरबही महाविहारमा हुने जनाइएको छ ।

टिमको कार्यसमिति सदस्य त्रिरत्न ग्वाछाको स्मृतिमा प्रतियोगिता हुन लागेको हो । ग्वाछाको हालै अल्पआयुमै अकल्पनीय निधन भएको थियो । ग्वाछा जिल्लाका चर्चित बुद्धिचाल खेलाडी थिए ।

प्रतियोगिताका विजयी खेलाडीहरुलाई पुरस्कार तथा प्रमाणपत्रको पनि व्यवस्था रहेको आयोजक टिमका अध्यक्ष केशव त्वानाबासुले बताए ।

उनका अनुसार प्रतियोगितामा पहिलो हुनेलाई २५ हजार, दोश्रो हुनेलाई १५ हजार र तेश्रो हुनेलाई १० हजार नगद पुरस्कारको व्यवस्था रहेको छ । साथै चौथौ हुनेलाई आठ हजार, पाँचौं हुनेलाई ६ हजार र सान्त्वनालाई पाँच हजार नगद पुरस्कारको व्यवस्था रहेको उनले जनाए । 

भक्तपुर युवा टिम भक्तपुरकै एउटा पुरानो खेलकुद खेलकुद टिम हो । यसले प्रत्येक वर्ष भक्तपुर कप खुुल्ला फुटबल प्रतियोगिता गर्दै आइरहेको छ । मित्रता अनुशाशन र स्वास्थ्यको लागि खेलकुद भन्ने मुल नाराका साथ टिमको स्थापना भएको थियो ।

प्रतियोगितामा भक्तपुर जिल्ला बुद्धिचाल संघको प्राविधिक सहयोग रहने जनाइएको छ ।