काठमाडौं । गुजरात टाईटन्स कोलकत्ता नाईट राईडर्सलाई हराउँदै भारतमा जारी ईन्डियन प्रिमियर लिग(आईपीएल) को शीर्ष स्थानमा उक्लिएको छ ।
कोलकत्ताको घरेलु मैदान ईडन ग्राडेनमा शनिबार भएको खेलमा गुजरात ७ विकेटले विजयी भएको हो ।
कोलकत्ताले दिएको १ सय ८० रनको लक्ष्य गुजरातले १७ दशमलब ५ ओभरमा पूरा गर्यो ।
गुजरातका लागि ओपनर शुभमन गिलले ३५ बलमा ८ चौकाको सहयोगमा ४९ रन बनाए । विजय शंकरले २४ बलमा २ चौका र ५ छक्काको सहयोगमा अविजित ५१ रनको अर्धशतकीय ईनिङ खेले ।
डेबिड मिलरले १८ बलमा २ चौका र २ छक्काको सहयोगमा अविजित ३२ रन बनाए । शंकर र मिलरले चौथो विकेटका लागि ३९ बलमा अविजित ८७ रनको साझेदारी गरेर टोलीलाई जित दिलाए ।
कप्तान हार्दिक पान्ड्याले २० बलमा २ चौका र १ छक्काको सहयोगमा २६ रन बनाए ।
कोलकत्ताका लागि हर्षित राणा,सुनिल नारेन र आन्द्रे रसेलले समान १/१ विकेट लिए ।
त्यसअघि टस हारेर पहिले ब्याटिङ गरेको कोलकत्ताले निर्धारित २० ओभरमा ७ विकेट गुमाएर १ सय ७९ रन बनाएको थियो ।
ओपनर रहमनउल्लाह गुर्बाजले ३९ बलमा ५ चौका तथा ७ छक्काको सहयोगमा ८१ रनको अर्धशतकीय ईनिङ खेले । अर्का ओपनर नारायण जगदिशनले १५ बलमा १९ रन बनाए ।
आन्द्रे रसेलले १९ बलमा २ चौका तथा ३ छक्काको सहयोगमा ३४ रन बनाए । रिंकु सिंहले २० बलमा १९ तथा वेंकटेस अय्यरले १४ बलमा ११ रन बनाए ।
गुजरातका लागि मोहम्मद सामीले ३ तथा जोसवा लिटिल र नूर अहमदले समान २/२ विकेट लिए ।
आठ खेलमा छ जित र दुई हारका साथ १० टोली सहभागी प्रतियोगितामा गुजरात पहिलो स्थानमा उक्लिएको छ ।
कोलकत्ता आठ खेलमा तीन जित र पाँच हारका साथ सातौं स्थानमा रहेको छ ।
