काठमाडौं । २२ औं राष्ट्रिय बुद्धिचाल च्याम्पियनसिपको खुल्लातर्फ फिडेमास्टर रुपेश जयसवाल, पूर्व नेपाल च्याम्पियन सुरवीर लामा र उदीयमान खेलाडी पुरुषोत्तम सिलवालले समान २ अंकका साथ संयुक्त अग्रता लिएका छन् ।
रुपेशले बुधबार दोस्रो चरणमा केशव श्रेष्ठलाई पराजित गरे । कालो गोटी लिएर सिलिसेन्स ड्राइगन प्रणालीमा खेल सुरु गरेका रुपेश सुरुवातमा रक्षात्मक थिए । ३५औं चालसम्म खेल बराबरी अवस्थामा ल्याउन सकेका उनले ४१औं चालदेखि आफ्नो पकड बनाए । ५४औं चालमा केशवलाई खेल त्याग्न बाध्य तुल्याए ।
सुरवीरले फिडेमास्टर क्षितिज भण्डारीलाई प्रतिस्पर्धात्मक रोमान्चक खेलमा पराजित गरी जितयात्रा कायम राखे । सेतो गोटी लिएर खेलेका सुरवीरले सातौं चालमा सिसिलिएन मार्को प्रणालीतर्फ धकेले । आक्रामक प्रत्याक्रमण भएको खेल ३३औं चालसम्म बराबरी अवस्थामा थियो । ३४औं चालमा क्षितिजको कमजोरीको फाइदा उठाएर अघि बढेका सुरवीरले ५७औं चालमा खेल आफ्नो पक्षमा पारे ।
उदीयमान युवा खेलाडी पुरुषोत्तम सिलवालले कोशी प्रदेश च्याम्पियन झापाका राजन सुवेदीलाई पराजित गरे । सेतो गोटी लिएर खेल सुरु गरेका पुरुषोत्तमले आक्रमक देखिएका राजनलाई केहि समयमै दवावमा राख्न सके । १४औं चालपछि नै राजन खेलमा पछि परिसकेका थिए । ३९औैं चालमा पुरुषोत्तमको जित निश्चित भयो ।
दिव्यांश मल्टी प्रोडक्सनको मुख्य प्रायोजनमा भइरहेको प्रतियोगितामा साविक विजेता पुरुषोत्तम चौलागाईं भने लगातार दोस्रो खेलमा असफल रहे । पहिलो चरणमा राजन सुवेदीसँग हारेका उनी दोस्रा चरणमा बुधबार झापाका प्रकाश नेपालसँग पराजित भए । पहिलो चरणमा सुरवीर लामासँग पराजित भएका क्यान्डिडेटमास्टर केशव श्रेष्ठ पनि अंकविहीन छन् ।
राजन सुवेदी, राजन पुरी, प्रकाश नेपाल र क्षितिज भण्डारीले १ अंक जोडेका छन् ।
महिलातर्फ वुमन फिडेमास्टर सुजना लोहनी, रिया श्रेष्ठ, सुशीला गुरुङ र शान्ती धिमाल लगातार दोस्रो चरणमा जित निकाल्दै २ अंकका साथ संयुक्त रुपमा शीर्ष स्थानमा छन् ।
सुजनाले पूजा भण्डारीलाई हराइन भने सुशीलााले साविक विजेता विजेता सिन्दिरा जोशीलाई पन्छाइन् ।
सुजना र पूजाको खेल रोमान्चक रह्यो । क्वीन्स ग्याम्विट प्रणालीमा खेल सुरु गरेकी सुजनाले लगातार आक्रमण गरिन् । रक्षात्मक बन्न बाध्य पूजाले ३१औं चरणसम्म आउँदा सुजनालाई कडा टक्कर दिएकी थिइन् । तर, एउटा ठूलो कमजोरीले उनी खेलमा पछि परिन् भने सुजनालाई नतिजा सुम्पन बाध्य रहिन् ।
रियाले पूजा सिंखडालाई पराजित गर्दा शान्ति धिमालले मार्सल तामाङमाथि जित निकालिन् । महिलातर्फ चितवनकी लक्ष्मी कँडेल र पूजा भण्डारीको १–१ अंक छ ।
नेपाल बुद्धिचाल महासंघ र लुम्बिनी इभेन्ट म्यानेजमेन्टको संयुक्त आयोजनामा काठमाडौको लाजिम्पाटस्थित होटल ले हिमालयमा जारी प्रतियोगितामा विहीवार तेस्रो र चौथो चरणका खेलहरु हुनेछन् । प्रतियोगितामा महिला र खुलातर्फको विजेताले यसै महिना बंगलादेशमा आयोजना हुने फिडे जोनल ३.२ बुद्धिचाल प्रतियोगिता तथा आगामी जुन ५–१५ सम्म काजाकस्तानमा आयोजना हुने एसियन कन्टिनेन्टल प्रतियोगितामा सहभागिता जनाउन पाउनेछन् । उनीहरुले सन् २०२४ मा हंगेरीमा हुने ४५औं चेस ओलम्पियाडमा पनि सहभागिता सुरक्षित गर्नेछन् ।
