कुवेतविरुद्ध युएईको सानदार जित

काठमाडौं । राजधानीमा जारी एसीयन क्रिकेट काउन्सिल(एसीसी) प्रिमियर कपमा कुवेतलाई सानदार पराजित गरि युएईले प्रतियोगिताको सानदार सुरुआत गरेको छ । 

टियु मैदानमा भएको खेलमा युएईले कुवेतलाई १ सय ४३ रनले पराजित गरेको हो ।

युएईले दिएको ३ सय ७२ रनको लक्ष्य पछ्याएको कुवेत ३६ दशमलब ३ ओभरमा २ सय २८ रन बनाउदै अलआउट भएको थियो ।  

कुवेतका लागि सायद मोनिबले ३६ बलमा ६८ रन बनाए । प्रविन्दर कुमारले २६ बलमा ५३ रनको सानदार अर्धशतकीय ईनिङ खेले । कप्तान मोहम्मद अस्लामले ३६ बलमा ३३ रन बनाए । 

युएईका लागि जुनेद सिद्धिकी र कार्तिक मैयप्पनले समान ३/३ तथा जाहोर खान,रोहन मुस्ताफा,सचित शर्मा र आयान खानले समान १/१ विकेट लिए । 

त्यसअघि टस हारेर पहिले ब्याटिङ गरेको युएईले ५० ओभरमा ६ विकेट गुमाएर ३ सय ७१ रन बनायो ।

युएईका लागि वृत्य अरविन्द र रोहन मुस्ताफाले अविजित शतकीय ईनिङ खेले । अरबिन्दले १ सय ४७ बलमा १७ चौका र ९ छक्काको सहयोगमा १ सय ८५ रन बनाए । 

मुस्ताफाले १ सय २४ बलमा १० चौका र ४ छक्का १ सय १८ रन बनाए । चार दशमलब चार ओभरमा २४ रन बनाएर तीन विकेट गुमाएरको स्थितीमा पुगेको युएईका लागि मुस्ताफा र अरबिन्दले शतकीय साझेदारी गरेर टोलीलाई बलियो योगफलसम्म पुर्याएका थिए ।

मुस्ताफा र अरबिन्दबीच चौथो विकेटका लागि २ सय ७५ रनको विशाल साझेदारी भएको थियो । दुईबीचको साझेदारी कुवेतका सयद मनिबले तोडेका थिए ।

आसिफ खानले ८ बलमा ३० रन बनाए । 

कुवेतका लागि प्रविन्दर कुमार र शाहरुख कुदरुसले समान २/२ तथा सयद मनिब,यासिन पटेलले समान १/१ विकेट लिए। 
 
फाइनल बाहेकका हरेक दिन दुवै मैदानमा समान १र१ खेल हुनेछ । जितसँगै युएई समूह बी मा २ अंकका साथ शीर्ष चौथो स्थानमा रहेको छ । 

हारबाट प्रतियोगिता सुरुआत गरेको कुवेत अंक तालिकाको चौथो स्थानमा रहेको छ । 

वैशाख १८ गते सम्म संचालन हुने प्रतियोगिताका खेलहरु कीर्तिपुरस्थित टियु मैदान र मुलपानीमा रहेको क्रिकेट मैदानमा खेल संचालन हुनेछ । 

कुल २४ खेल हुने प्रतियोगिताको फाइनल खेल वैशाख १८ गते टियु मैदानमा आयोजना हुनेछ । 

यस प्रतियोगितामा १० राष्ट्रको सहभागीता रहेको छ । १० राष्ट्रलाई दुई समूहमा विभाजन गरिएको छ ।

समूह 'ए' मा आयोजक नेपाल सहित मलेसिया,साउदी अरेबिया, कतार र ओमान रहेका छन् । समूह 'बी' मा बहराइन,कुवेत,सिंगापुर,हङकङ र युएई रहेका छन् ।

हरेक समूहमा शीर्ष स्थानमा रहने दुई टोली सेमिफाइनल खेल्ने छन् । सेमिफाइनलका विजेता राष्ट्रले फाइनल खेल्ने छ।

फाइनलको विजेता टोली एसीया कपका लागि छनोट हुनेछ । एसीया कप आगामी सेप्टेम्बरमा आयोजना हुनेछ । 

यस्तै शीर्ष तीनमा रहने टोली एसीसी ईमर्जिङ कपका लागि छनोट हुनेछन् ।