काठमाडौं । पाँचौं स्थानीय तह सहिद स्मृति अन्तराष्ट्रिय मकवानपुर गोल्डकप फुटबल प्रतियोगिताको विजेताले पुरस्कार रकम नपाएको गुनासो गरेका छन् । प्रतियोगिता आयोजनाको करिब दुई महिना बितेपनि विजेता र उपविजेता टिमले पुरस्कार वापतको रकम पाउन नसकेको गुनासो गरेका हुन् ।
जिल्ला फुटबल संघ मकवानपुरले माघ २९ गतेदेखि फागुन ११ गतेसम्म प्रतियोगिताको आयोजना गरेको थियो । हेटौडाको पिप्ले क्याम्पा रंगशालामा भएको प्रतियोगिताको उपाधि मनाङ मस्र्याङ्दी क्लबले जितेको थियो । हिमालयन शेर्पा क्लबलाई पराजित गर्दै मनाङले १५ लाख रुपैयाँ पुरस्कार राशीको उपाधि जितेको थियो । उपविजेता शेर्पाले १० लाख रुपैयाँ पाउने बताईएको थियो ।
विजेता टिमलाई आयोजकले चेक दिएर प्रतियोगिताको समापन गरेको थियो । तर बैंकमा जादाँ आयोजकले दिएको चेक नसाटिएको क्लबले गुनासो गरेका छन् । ‘बैंकमा जादा चेकमा पैसा छैन भन्छ । क्लबका पदाधिकारीलाई फोन गरे, सधै भोलि, भोलि मात्र भन्छन् ।’ मनाङ क्लबका एक पदाधिकारीले भने, ‘तीन तीन पटक सम्म पनि बैंकबाट चेक साटिएको छैन ।’
आयोजकले सुरुआतमा दुई, तीन दिनको भन्दै दुई हप्ता पछिको चेक क्लबलाई थमाएका थिए । त्यसपछि हप्ता दिनको भाका राख्दै आयोजकले मिति सार्दै आएको क्लबहरुको गुनासो छ । आयोजकले दिएको चेक तीन पटकसम्म वाउन्स गर्नुपरेको प्रतियोगिता विजेता क्लबका एक पदाधिकारीले बताएका छन् ।
मकवानपुर गोल्डकपको आयोजक जिल्ला फुटबल संघ मकवानपुरका अध्यक्ष टिका लामाको प्रतिकृया लिन खोज्दा उनको फोन उठेन । स्रोत सुनिश्चितता बिनै आयोजनाको सुरुआत गरिएको प्रतियोगिताको पुरस्कार दिने विषयमा समस्या देखिएको छ ।
अन्तिम समयमा प्रदेश सरकारले प्रतियोगितालाई सहयोग गर्ने बताएको थियो । प्रतियोगितालाई ब्यवस्थित गर्न नसक्दा पछिल्लो समय मोफसलका गोल्डकप फुटबल प्रतियोगिता बदनाम हुन थालेका छन् ।
-1751767608.webp)
