नेपाली इतिहासकै ठुलो फिटनेस इभेन्ट्स हुँदै

काठमाडौं । नेपाली इतिहासकै ठुलो फिटनेस इभेन्ट्स पाँचौं स्ट्रिट वर्कआउट (खुल्लाव्यायाम) आयोजना हुने भएको छ।

आयोजक नेपाली युथ फिटनेस एण्ड केलिस्थेनिक्स (एनवाइएफसी) ले आइतबार पत्रकार सम्मेलनको आयोजना गर्दै प्रतियोगिता बैशाख ९ गते शनिबार हुने जनाएको छ ।

काठमाडौं नक्सालस्थित नारायण चौरमा आयोजना हुने प्रतियोगितामा बार वर्कआउट र सर्किट वर्कआउट गरि दुई वटा विधा हुनेछन् ।  जसमा पुरुष बार, पुरुष सर्किट, महिला सर्किट, सिनियर ४०+ सर्किट, अन्डर १६ बार गरि जम्मा ५ वटा समूहमा खेल हुनेछ ।

प्रतियोगितामा पहिलो, दोस्रो र तेस्रो हुनेले क्रमशः २० हजार, १५ हजार र १० हजार नगद पुरस्कार सहित पदक तथा प्रमाणपत्र पाउने छन् ।

बार वर्कआउट र सर्किट वर्कआउटको संयुक्त विधामा सर्वोत्कृष्ट समयमा तोकिएको वर्कआउट पूरा गर्ने खेलाडीले समग्र प्रतियोगिताको विजयी हुनेछ । उक्त खेलाडीलाई नेपालको फिटनेस एथ्लेट उपाधी सहित नगद ५१ हजार पाउने छन् ।

यस प्रतियोगितामा देशभरका विभिन्न जिल्लाहरुबाट नेपाल भरबाट करिब ३५० देखि ४०० जना जति खेलाडीहरुको सहभागिता रहने छ । त्यस मध्ये फाइनलमा २०० खेलाडी छनौट गरि प्रतिस्पर्धा गराइने आयोजकले जनाएको छ ।

प्रतियोगिताको मुख्य प्रायोजकमा हिमालय क्वेस्टा प्रो प्रोटीन सप्लिमेन्ट कम्पनी रहेको आयोजकले जनाएको छ ।